Dia 8 di mart último Konseho Insular di Boneiru a bai di akuerdo ku e medidanan pa redusí gastu di hür i mehorá protekshon hurídiko di hürdó. Awor akí ta apliká e tabèl di hür segun entrada, ku ya kaba nan tabata usa pa e Kontribushon Hür Partikulir (Bijdrage Particuliere Verhuur - BPV), riba kas di hür sosial tambe. Esaki ta nifiká un situashon igual pa kada hürdó, tantu sosial komo partikulir. E gastunan haltu di kosto di bida, ku ta afektá prinsipalmente hende ku un entrada abou fuertemente, i e merkado di kas di hür ku ta bou di preshon, tabata e motibu pa Kolegio Ehekutivo proponé e medidanan akí.
Adaptashon di e límite di liberalisashon di $750 pa $937 ta nifiká ku ta trese mas kas di hür, tantu den e segmento sosial komo den e segmento partikulir, bou di hurisdikshon di e Komishon di Hür. Hende ku ta hür kas te ku $937 pa luna, den kaso ku tin duda tokante haltura di e preis di hür, por pidi Komishon di Hür pa evaluá e preis di hür hasiendo uso di e sistema di balorashon di bibienda i duna un veredikto ku ta obligatorio pa tantu e hürdó komo e doño di kas. Ku esaki e adaptashon di e límite di liberalisashon ta oumentá e siguridat hurídiko pa e hürdó, ku posibelmente un hür mas abou komo resultado. Wak www.huurcommissiebonaire.com
Ta apliká e tabel akí kaba den e proyekto piloto Kontribushon Hür Partikulir (Bijdrage Particuliere Verhuur - BPV) di Entidat Públiko Boneiru. Hürdónan den sektor di hür partikulir ku un entrada mensual pa kas di famia te ku maksimalmente tres biaha e sueldo mínimo ($3708) por hasi uso di e redukshon di gastu di hür temporal akí. Pa esaki wak https://bonairegov.com/pa/habitante/bpv
Awor akí ta apliká e tabèl akí pa e sektor di hür sosial tambe, loke ta sòru pa un situashon igual pa redusí gastu di hür. E medidanan ta regardá adaptashon di e tabèl di hür segun entrada i e límite di liberalisashon. Ku esaki a adaptá tantu e Ordenansa di subsidio di hür komo e Ordenansa di Komishon di Hür i e Ordenansa di preis di hür. E tabèl di hür segun entrada ta indiká kua parti di e entrada pa kas di famia maksimalmente lo mester gasta na hür pa por yega fin di luna.
E tabèl di hür segun entrada ta determiná e rebaho di hür ku e hürdónan ta haña serka nan doño di kas sosial. Pa hende ku ta hür kas serka Fundashon Cas Boneriano e tabèl nobo ta nifiká ku pa luna nan ta bai paga un promedio di $115 ménos na hür. A formulá e tabèl nobo den kolaborashon ku NIBUD, un sentro di konosementu i konseho independiente riba tereno di finansa di kas di famia.
A inkluí e medidanan den e agènda di maneho Bibienda Popular i Ordenamentu Teritorial pa Hulanda Karibense ku Entidat Públiko Boneiru a akordá ku Ministerio di Asuntunan Interno / Bibienda Popular i Ordenamentu Teritorial pa konhuntamente traha riba un situashon di bidienda mas mihó na Hulanda Karibense. Minister Hugo di Jonge di Bibienda Popular i Ordenamentu Teritorial ta pone medionan finansiero èkstra disponibel ku ta mará na e medidanan (mas òf ménos $300.000 pa aña). Pa e agènda di maneho, wak www.rijksoverheid.nl
