Riba djabièrnè 7 di ougùstùs 2026 shete inspektor di Direktorado di Supervishon i Mantenshon di Lei a huramentá komo Agente Polisial Ekstraordinario (Buitengewoon Agent van Politie – BAVPOL). Ku e huramentashon akí, awor Direktorado di Supervishon i Mantenshon di Lei ta disponé di 21 Agente Polisial Ekstraordinario - BAVPOL. Di e manera akí Direktorado di Supervishon i Mantenshon di Lei tin mas inspektor ku por aktua dentro di e kompetensianan ku a otorgá na nan.
Anteriormente e aña akí e shete inspektornan a finalisá nan formashon di BAVPOL eksitosamente. Durante e formashon akí nan a atkerí entre otro konosementu tokante lei penal i prosesamentu penal. Nan a siña tambe kon nan mester aktua na un manera profeshonal, kon nan mester formulá prosèsverbal i kon nan por usa nan kompetensianan na e manera korekto.
Komo BAVPOL e inspektornan tin sierto kompetensianan ku nan por usa durante nan trabou. Kua kompetensia nan tin por di apliká, ta dependé di nan instrukshon, nan akta i e legislashon i regulashon vigente. Dentro di e kuadronan akí por ehèmpel nan tin mag di kontrolá pa verifiká nan identidat i traha prosèsverbal.
Ku 21 BAVPOL, Direktorado di Supervishon i Mantenshon di Lei por aktua mesora den mas situashon, ora esaki ta kai dentro di e kompetensianan di e inspektor. Esaki ta fortifiká e supervishon i mantenshon di lei diario, i ta sòru pa inspektornan por atendé na un manera mas profeshonal i mas efektivo ku sierto situashonnan.
E huramentashon ta forma parti di e profeshonalisashon mas aleu di Direktorado di Supervishon i Mantenshon di Lei. E direktorado ta sigui invertí den formashon, konosementu i desaroyo di su empleadonan. Ku esaki Direktorado di Supervishon i Mantenshon di Lei ke kontribuí na un Boneiru seif, ordená i habitabel.
