BPV
Kiko ta nifiká kontribushon pa hür partikular ?
E kontribushon di hür partikular ta pèrkurá pa e hürdó paga ménos sèn na hür. Esaki ta un kontribushon mensual ku Gobièrnu ta duna pa kubri gastu hür di personanan ku ta hür kas den sektor privá.
Kiko ta e meta di kontribushon hür partikular?
Bibienda den sektor privá na Bonaire ta birando dia pa dia mas karu i ta bira difísil pa e grupo ku entrada abou haña un kas pa hür. Meta di e kontribushon akí ta pa hasi bibienda mas pagabel pa e hürdó, sin ku e doño di kas ta hiba pèrdida den e ganashi.
E kontribushon ta manera un supsidio ku e doño di kas ta risibí. Nan ta kalkulá esaki a base di entrada i gastu di kas di e hürdó.
Ken por bini na remarke pa e kontribushon pa hür partikular?
E kontribushon ta destiná pa personanan ku ta hür un kas di 750 USD òf ménos, ku tin un entrada abou i ta hür den e sektor privá. Pa por bini na remarke pa e kontribushon akí e hürdó mester tin un kontrakt di 1 di yüli òf promé ku e fecha aki.
Pa ki periodo e kontribushon pa hür partikular ta konta?
E kontribushon ta un proyekto piloto ku un durashon di 6 luna. Ku e proyekto piloto aki lo bai wak posibilidatnan pa por introdusí esaki den futuro pa un tempu mas largu òf kisas strukturalmente. E proyekto piloto aki lo inisiá dia 11 di mart 2022 i terminá dia 1 di sèptèmber 2022.
Ken ta ehekutá e proyekto aki?
Entidat Públiko Boneiru ta ehekutá e proyekto piloto akí. Ministerio di Asuntunan Interior ta finansiá ehekushon di e proyekto piloto.
Kiko ta spera di e doño di kas na hür?
E doño di kas i e hürdó ta hasi e petishon huntu. Ta paga e kontribushon na e hürdó, ku na su momento lo baha e montante di hür pa luna. E hürdó lo risibí e mesun montante di hür tur luna. Huntu ku e montante di kontribushon e doño di kas lo risibí un bónus di 50 USD pa luna pa partisipá na e proyekto. Ku e proyekto akí e doño di kas por tin mas sigur ku e hürdó por kubri su gastunan di kas, pa evitá retraso i problema di pago di hür.
Kiko ta e kondishonnan pa bin na remarke?
Doño di e kas di hür i e hürdó mester partisipá huntu den e proyekto. Partisipashon na e proyekto ta boluntario. Pa partisipá mester kumpli ku e siguiente eksigensianan:
- E hürdó prinsipal di e kas mester ta inskribí na Boneiru;
- E hürdó di e kas mester tin un suèldo di entrada na Boneiru;
- E suèldo di entrada ta kai den e tabèl di hür i tambe mas abou ku USD 22.346 pa aña;
- E hür mensual (sin gastu di servisio i gastu di muebl’é) ta 750 USD òf ménos;
- Un kontrakt di hür válido ku a firma por lo ménos 6 luna promé ku entrega di e petishon;
- E hürdó no por ta na Boneiru pa un tempu kòrtiku ku fakansi , estudio, stazje òf kualkier otro motibu.
Kon por hasi petishon?
Por hasi petishon for di dia 11 di mart 2022. Por hasi esaki hasi na e siguiente manera:
- Por download e formulario di petishon, prent i yena esaki huntu ku e dokumentunan rekerí i entregá esaki.
- Por pasa tuma e formulario na Direktorado di Komunidat i Kuido, yena i entregá esaki huntu ku e dokumentunan rekerí.
PAGA TINU: E petishon mester ta kompletamente yená huntu ku e pruebanan rekerí. No ta tuma petishonnan inkompleto den prosedimentu.
Pa entrega di petishon por hasi esaki na Direktorado di Komunidat i Kuido na Kaya Neerlandia 41 di djaluna pa djabièrnè entre 8 or di mainta te ku 11 or di mainta.
Pregunta?
Bo tin pregunta òf bo mester di yudansa ku e petishon?
Tin un tim spesialisá pa kontestá tur pregunta i asistí ku yudansa.
Por manda un e-mail na aportehurpartikular@bonairegov.com of traha un sita via e number di telefòn : 7172211.
Ta atendé e petishon den un término di 3 SIMAN despues di entrega di bo petishon.
