Direktorado di Supervishon i Mantenshon di Lei ta aktua kontra uso ilegal di tereno públiko

Siman pasá Direktorado di Supervishon i Mantenshon di Lei a kuminsá ku akshon di mantenshon di lei kontra uso ilegal di tereno públiko sin pèrmit bálido di prekario. Durante e akshonnan akí a kita entre otro bòrchi di propaganda na Belnem i Sabadeco i vários baranka for di tereno di gobièrnu na Playa Lechi. Nan a hasi e trabou na Playa Lechi den kolaborashon ku STINAPA. Direktorado di Supervishon i Mantenshon di Lei ta enfatisá ku ta prohibí pa pone kos riba tereno públiko sin outorisashon òf sin pèrmit.

E akshonnan akí ta forma parti di un trayekto ku durashon mas largu di mantenshon di lei preventivo. Den e di dos i e di tres kuartal di aña 2025, Direktorado di Supervishon i Mantenshon di Lei a parti karta di informashon pa habitantenan i empresarionan den e área for di Sabadeco te Punt Vierkant. Despues di esei nan a ehekutá diferente inspekshon i nan a entregá karta di atvertensia kaminda esaki tabata nesesario. Di e manera akí Direktorado di Supervishon i Mantenshon di Lei a duna informashon promé i a duna e hendenan en kestion oportunidat pa nan mes solushoná e situashon.

Ku regularidat Direktorado di Supervishon i Mantenshon di Lei ta mira ku hendenan ta hasi uso di tereno públiko sin pèrmit. Ehèmpel di esaki ta ponementu di baranka, palu òf mata riba asera, palu di markashon ku hende ta pone sin pèrmit i kadena ku nan ta usa pa sera un pida tereno sin pèrmit. Esaki por sòru pa molèster, e por blòkia espasio públiko i kousa situashonnan peligroso pa siguridat di tráfiko.

Direktorado di Supervishon i Mantenshon di Lei ta supliká habitantenan i empresarionan pa nan mes kita kualke opheto ku nan a pone riba tereno públiko sin pèrmit. Si durante kontròl Direktorado di Supervishon i Mantenshon di Lei topa ku un situashon asina, nan ta kita e ophetonan akí. Ku e aserkamentu akí Direktorado di Supervishon i Mantenshon di Lei ke sòru pa un espasio públiko seif, nèchi i aksesibel pa tur hende na Boneiru.

Por hasi petishon pa un pèrmit òf un pèrmit di prekario via  bonairegov.com/pa/empresarionan/permitnan. Pa mas informashon por tuma kontakto ku Entidat Públiko Boneiru via e number di telefòn 715 5330.