For di djabièrnè 18 te ku djadumingu 20 di sèptèmber, Entidat Públiko Boneiru i Selibon ta organisá e promé rònt di Bario Limpi di e aña akí. Durante tres dia tin baki di Sushi den diesdos bario, pa asina na un manera fásil nos habitantenan por deshasí di sushi grandi i pisá, i sushi ku hende ta riba kaya. Meta di esaki: ménos dùmpmentu ilegal di sushi i barionan mas limpi.
E dia final, djadumingu 20 di sèptèmber, ta kai huntu ku World Cleanup Day – Dia Mundial di Limpiesa, ora ku miónes di hende rònt mundu ta tene limpiesa den nan bisindario. E personanan ku den e wikènt ei depositá sushi den e baki den nan bario, ta kontribuí pues na un Boneiru mas limpi i riba e último dia ta djòin un akshon mundial. “Un bario limpi ta kuminsá serka nos mes”, esaki ta e mensahe ku Entidat Públiko Boneiru ke aksentuá e aña akí. Dùmpmentu ilegal di sushi ta forma un menasa pa un ambiente di biba limpi, seif i salú.
E bakinan di sushi ta intenshoná pa opheto grandi i pisá: muebel, kolchon, aparato bieu, artíkulo pa uso den kas, sobrá di palu i kantidat chikitu di sushi di kurá. No tin mag di tira sushi peligroso òf sushi spesial, manera sushi di konstrukshon, fèrf i produkto kímiko, produkto di petrolio, bateria di outo, asbèst, sushi médiko, kantidat grandi di bio-fertilisante i bòter di gas den e bakinan. Pa e kategorianan ei tin regla apart na vigor. Ta supliká habitantenan pa entregá e tiponan di sushi akí direktamente na Selibon òf na e puntonan di rekolekshon destiná pa esaki.
Na unda e bakinan grandi di sushi ta?
Nr. Bisindario / Bario Kaya / Lokashon spesífiko
1 Rincon Sentro di Bario Rincon
2 Tra’i Montaña Fèlt di futbòl Tra’i Montaña
3 Antriol Pabou Kaya Gatu
4 Antriol Pariba Parke Patun Saragoza
5 Amboina Sentro di Bario Amboina
6 Nikiboko Nort Sentro di Bario Nikiboko
7 Nikiboko Sùit Parke L. Clarinda
8 Tera Kòrá Sentro di Bario Tera Kòrá
9 Nort’i Saliña Sentro di Bario Nort’i Saliña
10 Belnem Entrada di Kaya Ir. R. Statius van Eps
11 Hato Entrada di Kaya Diamanta (na Curoil Hato)
12 Playa Stadion di futbòl Playa
Un ambiente di biba limpi ta kontribuí na salú i bienestar di tur hende. Pa medio di deshasí di sushi na e manera korekto, nos ta yuda prevení molèster, plaga, lugá di brui pa sangura i otro riesgonan di salú. Di e manera akí huntu nos ta kontribuí na un ambiente di biba seif, salú i agradabel pa tur hende.
Entidat Públiko Boneiru ta hasi un yamada riba tur habitante pa durante henter wikènt depositá nan sushi den e baki den nan propio bario, mantené nan kaya limpi i no dùmp sushi den naturalesa. Banda di esaki nos ta invitá tur hende pa riba djadumingu 20 di sèptèmber partisipá aktivamente na World Cleanup Day – Dia Mundial di Limpiesa.
Bario Limpi. Nos bario, nos responsabilidat.
