For di 2024 akohida pa mucha i skol ta haña nan propio biblioteka for di e programanan ‘Biblioteka na Skol’ i ‘Boekstart na pasadia pa mucha’. Skol, pasadia pa mucha i Biblioteka Públiko durante un enkuentro 29 di novèmber a hasi palabrashon ku otro tokante esaki.
Biblioteka Públiko ke enkurashá muchanan na skol i pasadia pa mucha, pa lesa mas i tin plaser den lesamentu. Skolnan i pasadianan pa mucha ta haña yudansa di Biblioteka Públiko pa kuminsá ku nan propio biblioteka i bestèl buki.
Un eksperto ku sa hopi di buki i buki di mucha, ta bai yuda i guia skolnan i pasadia pa mucha ku esaki. E persona akí, un ‘konsehero di lesamentu’, ta organisá tambe aktividat pa skol i pasadia pa mucha. Por ehèmpel bishita di un outor di buki di mucha na skol.
Biblioteka Públiko Boneiru ta traha estrechamente ku ministerio di Enseñansa, Kultura i Siensia, Biblionet Groningen, i Stichting Lezen. E fundashon akí a desaroyá e programa BoekStart. Esaki ta un programa amplio i sólido pa enkurashá mucha pa lesa mas pa un tempu largu.
Den e programa akí tin hopi atenshon pa lesa pa otro, lesa mihó i sigui lesa. Na e enkuentro fin di novèmber, Gonny Apol di Biblionet Groningen tabata presente riba enkargo di Stichting Lezen. Durante e enkuentro ei, Apol a duna splikashon tokante e programanan di lesamentu. E representantenan di skol i pasadia pa mucha ku tabata na e enkuentro, a interkambiá eksperensia tokante lesamentu i mucha.
Ministerio di Enseñansa, Kultura i Siensia a pone sèn disponibel pa e programanan ‘Biblioteka na Skol’i ‘Boekstart na Akohida pa Mucha.’ Diputado Nina Den Heyer ta hopi positivo ku e desaroyonan na biblioteka i e kooperashon ku skol i pasadia pa mucha.
Den Heyer ta haña importante ku mucha tin plaser ora nan ta lesa. Ta importante tambe ku ta enkurashá mucha pa lesa mas. ,,Komo adulto nos mester duna mucha e bon ehèmpel lesando nos mes tambe mas, òf lesando mas pa nan, ‘’ asina Den Heyer a deklará.
