Kolegio Ehekutivo i STINAPA a palabrá pa pone un paro na tiramentu di kabritu den Parke Washington Slagbaai pa un periodo. Den e último simannan tiramentu di kabritu den Parke Washington Slagbaai a lanta basta diskushon i emoshon den nos komunidat. Kolegio Ehekutivo i STINAPA ta konsiente di e preokupashon i sintimentunan ku ta biba den nos pueblo i ta tuma nan na serio. P’esei durante e periodo akí nos ta investigá kon nos por pone mas kabritu disponel pa pueblo. Kolegio Ehekutivo i STINAPA a yega na e palabrashon akí durante un reunion djamars 15 di sèptèmber.
Proyekto Parke Bunita
E meta di Proyekto Parke Bunita ta pa trese palu, mata, i bestia bèk ku originalmente tabatin den parke. Ta konosí ku kabritu ta kana kome mas di loke nos naturalesa por produsí.
For di 2019, mayoria kabritu ku ta sali for di parke ta sali na bida. Nan ta bai pa hende, instansia, i misa ku por hasi bon uso di nan. Den praktiká ta logra duna mas o ménos 75 % di kabritu bibu na bon kousa, i ta tira mas o ménos 25 % di nan komo último rekurso. Na mes momento, e promé resultadonan di e proyekto ta visibel. Den e áreanan ku a saka kabritu kaba, pa prome biaha den basta aña por mira señal ku naturalesa a kuminsá rekuperá su mes.
Espasio
Nos ta hasi un yamada na pueblo pa duna espasio pa por hasi e investigashon nesesario debidamente.
