Durante e reunion di Komishon Fiho di Planifikashon i Desaroyo ku a tuma lugá dia 28 di novèmber 2024, a presentá un nota di inisio di Ordenansa di Bibienda na Konseho Insular. Esaki ta forma e base pa elaborashon mas aleu di e medida akí. Intervenshon den e merkado no ta un meta riba su mes, sino un medida pa redusí e falta di bibienda pagabel na Boneiru. E meta konkreto ta. un repartishon balansá di espasio pa biba, pa hasi posibel duna hende ku tin un laso sosial ku nos isla preferensia na momentu di kompra di un bibienda.
Den e lunanan tras di lomba Kolegio Ehekutivo a konsultá ku vários stakeholder pa loke ta trata elaborashon di e kondishon di e Ordenansa di Bibienda planiá pa Boneiru.
E kondishonnan konkreto ku a presentá ta:
- 5 aña di residensia sin interupshon den e último 10 aña;
- Laso sosial konforme e definishon komo yu di nos isla;
- E ordenansa lo ta vigente pa bibienda ku un balor di merkado te ku 175% di e garantia di hipotek. Aktualmente e garantia di hipotek pa Boneiru konosé un suma límite di 305.000 USD. Loke ta nifiká ku e ordenansa ta konta pa bibienda te ku $533,750. No tin restrikshon pa bibienda riba e montante aki i e merkado liber ta keda liber pa esaki.
Punto di preokupashon i atenshon di merkado
Durante e konsultanan a surgi algun punto konkreto di preokupashon i atenshon, manera:
• Altura di e suma máksimo palabrá : ‘Stakeholders’ ta konsehá pa revisá i posiblemente redusí e montante máksimo pa e ta mihó pa e merkado lokal.
• Periodo di benta: No tin un límite stipulá ainda pa kuantu tempu un kas mester ta na benta denter di e ordenansa. Ta konsiderando pa pone un término máksimo pa esaki.
• Destinashon área di biba: Tin preokupashon tokante si e ordenansa ta bai konta tambe pa por ehèmpel áreanan ku e destinashon ‘Mesklá’. Partikularmente pa motibu ku hospedahe rekreativo ta posibel den e destinashon akí. Ta importante pa enfatisá ku e regulashon ta enfoká prinsipalmente riba ‘área di biba’.
Kiko esaki ta nifiká pa e residentenan?
Si adoptá e regulashon aki, personanan ku un laso sosial ku Boneiru lo haña prioridat na momentu di kumpra un kas te ku USD 533.750. Esaki ta nifiká ku invershonistanan òf residentenan nobo sin lasonan di largu plaso ku e isla no por simplemente kumpra kasnan den e rango di preis aki. Esaki ta kontribuí na un distribushon mas hustu di bibienda i ta hasié mas fásil pa residentenan lokal haña bibienda pagabel.
Nos ke tende di bo!
Anteriormente a hasi un yamada na nos pueblo pa laga tende di nan tambe pa e konsulta akí. Lamentablemente te ku awe tiki reakshon a drenta. Diputado Cicilia ta enfatisá ku ta hopi importante pa kompartí puntonan di atenshon si tin esakinan, di manera ku ainda por inkluí esakinan mas aleu di e kondishonnan. Pa awor, e planifikashon ta pa den e di dos kuartal di aña 2025 bolbe bai Konseho Insular ku un kontinuashon riba e nota di inisio ku a keda tratá anteriormente. “Tin tempu i espasio pues ainda pa input. Hasi uso di e oportunidat akí!”, segun diputado Anjelica Cicilia.
Por tira bista den e nota di inisio Ordenansa di Bibienda via wèpsait di Konseho Insular: www.KonsehoInsular.org.
Kompartí bo opinion - Den kaso ku komo habitante òf interesado bo tambe ke bisa algu tokante e nota di inisio akí, esei ta posibel pa medio di manda un imeil na Kontami@Bonairegov.com ku den e título un referensia na e nota di inisio Ordenansa di Bibienda.
Bo opinion ta konta! Probechá di e oportunidat aki pa influensiá e futuro di e merkado di bibienda na Boneiru.
