Haf di Boneiru a tene su ehersisio anual di siguridat huntu ku Carnival Cruise Line, den kuadro di e Kódigo Internashonal di Siguridat di Barku i Fasilidat di Haf (International Ship and Port Facility Security Code – ISPS) i e prosedura di siguridat di nos isla. E ehersisio a tuma lugá den forma di un ehersisio konhunto estilo ‘tabletop’, ku a enbolbí representantenan na bordo di Carnival Horizon, outoridatnan relevante na Boneiru i e Fleet Operations Center na Miami.
Meta di e ehersisio tabata pa tèst kon nos haf, e barku, outoridatnan lokal i servisionan ousiliar ta traha huntu den kaso di un insidente di siguridat.
A tèst kolaborashon i prosedura
Durante e ehersisio nan a tèst diferente komponente di e plan di siguridat di haf di Boneiru. Esaki a enserá entre otro evaluashon di e plan i tèstmentu di e prosedura pa alsa e nivel di siguridat operashonal, na momentu ku un situashon ta rekerí esaki. Nan a tèst tambe e komunikashon i kolaborashon entre e barku i outoridatnan na tera. Banda di esaki un evakuashon hipotétiko di pasahero a forma parti di e ehersisio, di manera ku e timnan por a tèst e proseduranan bou di preshon.
Un parti importante di e ehersisio a enfoká riba kolaborashon entre e diferente instansianan i servisionan ousiliar na Boneiru, entre otro polis, Koninklijke Marechaussee (KMar), hòspital i kuerpo di bombero. Durante e ehersisio nan a investigá kon e diferente organisashonnan ta interkambiá informashon, repartí tarea i traha huntu durante un insidente.
E partisipantenan a trein tambe kon nan por baha e nivel di siguridat operashonal, asina ku e situashon ta bou di kontròl. Banda di esaki nan a dediká atenshon na prevenshon i medidanan ku por yuda redusí riesgo pa insidentenan di siguridat similar.
Eksigensia anual
A base di e instrukshonnan di siguridat vigente, nos haf tin obligashon pa regularmente ehekutá e tipo di ehersisionan akí. Por lo ménos un biaha pa aña mester tene un ehersisio, i e periodo entre dos ehersisio no tin mag di ta mas largu ku 18 luna. Pa medio di e ehersisionan akí haf di Boneiru ta sigui fortifiká su preparashon pa posibel insidentenan di siguridat i mehorá e kolaborashon entre tur partidonan enbolbí.
Kapitan di Haf a deklará: “E ehersisio akí ta yuda nos fortifiká siguridat di haf di Boneiru mas aleu i mehorá nos preparashon pa potensial insidentenan di siguridat.”
