Un parti di e tereno pa stashoná outo na Stadion di Playa ta disponibel atrobe i por ser usá pa stashoná outo, tambe durante Regatta. E entrada temporal di e tereno pa stashoná outo ta via Kaya Hermandad. For di 13 te ku 18 di òktober e lusnan di e stadion ta keda sendé te 3:30 or di mardugá. Esaki ta kontribuí na visibilidat i seguridat riba i rondó di e tereno durante di Regatta.
Na fin di luna di yüli Direktorado di Supervishon i Mantenshon di Lei a kuminsá ku limpiesa i restorashon di e tereno pa stashoná outo. Riba e tereno akí pa hopi tempu tabatin kònteiner, treiler, ekipo pisá i otro ophetonan. Debí na esaki no por a usa e tereno bon mas komo lugá di stashoná outo. Danki na koperashon di diferente usuario, entre tantu a hasi un parti di e tereno liber i e ta aksesibel atrobe komo fasilidat pa stashoná outo. Direktorado di Supervishon i Mantenshon di Lei ta gradisí tur esnan enbolví ku a koperá ku esaki. Ta kontinuá ku e proyekto ku komo meta pa pone e tereno pa stashoná outo kompletamente bèk den su funshon públiko.
Durante Regatta ta èkstra drùk den sentro di siudat. Pa e motibu akí Direktorado di Supervishon i Mantenshon di Lei ta pidi tur hende pa stashoná nan outo na un manera responsabel. Stashoná bo outo solamente kaminda esaki ta pèrmití i tene tur entrada, salida i asera liber. Di e manera akí sentro di siudat ta keda seif i alkansabel pa tur hende, pa servisionan ousiliar tambe.
Direktorado di Supervishon i Mantenshon di Lei ta deseá tur hende un Regatta seif.
