Boneiru i Aruba ta eksplorá kolaborashon riba tereno di maneho di sushi

Riba djárason 7 di òktober diputado Dennis Martinus a papia ku minister presidènt di Aruba Mike Eman tokante diferente tópiko ku na e momentu akí ta di importansia na Boneiru i Aruba. Maneho di sushi i e posibilidatnan pa kolaborashon entre e dos islanan akí a forma un parti importante di e kòmbersashon.

Tantu Boneiru komo Aruba ta konfrontando desafionan riba tereno di rekohementu i prosesamentu di sushi. Durante e konsulta nan a kompartí nan eksperensianan i nan a deliberá tokante un posibel kolaborashon riba tereno di prosesamentu sostenibel di sushi i resiklahe. Den esaki nan a wak entre otro e posibilidatnan pa prosesá sushi i kombertí esaki den un produkto final ku posibelmente por tin balor ekonómiko tambe. 

“Boneiru i Aruba ta islanan ruman i nan ta enfrentando hopi desafio komparabel. Netamente pa e motibu akí ta di gran balor pa siña di otro, kompartí konosementu i huntu wak e solushonnan ku ta yuda nos islanan progresá. E kolaborashon i konektividat akí nos ke sigui fortifiká,” segun diputado Martinus.

Den e periodo binidero nan ta wak na unda Boneiru i Aruba por sigui interkambiá konosementu i eksperensia i na unda kolaborashon ta posibel.