Prohibishon temporal di glas den sentro di Kralendijk durante Regata

Durante Regata tin un prohibishon temporal di glas den algun área indiká di sentro di Kralendijk. E prohibishon ta konta tur anochi di 18:00 te 06:00 or. E ta kuminsá 11 di òktober 2026 pa 18:00 or i ta terminá 18 di òktober 2026 pa 06:00 or.

Despues di deliberashon ku e triángulo di seguridat, gezaghèber a tuma e medida aki pa protehá bishitantenan, empleadonan i empresarionan. Glas por kibra i kousa herida grave.

Kiko ta permití i kiko no ta permití?

Durante e prohibishon di glas, e siguiente reglanan ta konta den e área indiká:

• Bòter di glas pa bebida ta prohibí. Bo no mag tin nan serka bo ni hiba nan ku bo, tampoko si e bòter ta será ainda. Esaki ta konta tambe pa otro tipo di enbase di glas pa bebida.
• E prohibishon ta konta riba kaya, riba plasa, den lokalnan di horeca i riba e terasanan i áreanan pafó ku ta pertenesé na e lokalnan.
• Empresarionan di horeca no mag sirbi ni duna bebida den bòter di glas òf otro enbase di glas na nan kliente.

Un glas normal pa bebe ta permití den horeca. Por ehèmpel, un kafé òf restorant mag sirbi bebida den un glas. Bo mag usa e glas solamente paden di e lokal, riba su terasa òf den e área pafó ku ta pertenesé na e lokal. No hiba e glas ku bo riba kaya.

Na unda e prohibishon ta konta?

E prohibishon ta konta den e área indiká na e siguiente kayanan i partinan di kaya:

• Kaya Libertador Simon Bolivar;
• Kaya L.D. Gerharts;
• Kaya Grandi, te na e krusada ku Kaya L.D. Gerharts;
• Kaya J.N.E. Craane, for di e krusada ku Kaya Bonaire te na Kaya C.E.B. Hellmund;
• Kaya Bonaire;
• Kaya Isla’ Riba;
• Kaya C.E.B. Hellmund, te na e krusada ku Kaya Gilberto F. Croes;
• Kaya Gilberto F. Croes, te na e krusada ku Kaya Hermandad;
• Kaya Hermandad;
• Julio A. Abraham Boulevard, te na e krusada ku Kaya Gilberto F. Croes.

Huntu nos ta sòru pa un Regata sigur

Entidat Públiko Boneiru (OLB) ta pidi bishitantenan i empresarionan pa koperá. Usa alternativanan sigur, manera bleki di bebida òf beker ku por usa di nobo. Esun ku a propósito no sigui e prohibishon por haña un kastigu penal.

Huntu nos ta sòru pa un Regata sigur i agradabel.