Opheshon kontra èrfpagt

Bo a risibí un faktura pa uzo di tereno i bo no ta di akuerdo ku esei?
E ora ei bo por manda un karta òf e-mail pa entidat públiko Boneiru (EPB). Esaki yama hasi opheshon kontra èrfpagt.

Kiko e produkto òf servisio aki ta nifiká?

Kiko bo mester tene bon kuenta kuné?

Bo no ta di akuerdo ku bo faktura pa uzo di tereno di entidat públiko Boneiru? Manda e ora ei, denter di dos luna despues di e fecha riba e faktura, un karta òf e-mail.
Si bo ta muchu lat, nos no por yuda bo mas e ora ei.

E tereno ku bo ta usa ta di EPB. Pa esei bo ta paga plaka tur aña. Esaki yama èrfpagt.

Riba e faktura tin pará kuantu bo ta paga. E faktura akí yama un kuenta di èrfpagt.

Bo no ta di akuerdo ku e faktura ku bo a risibí?
Por ehèmpel, pasobra e datonan no ta korekto, òf pasobra e montante no ta bon?
E ora ei bo por partisipá esei na nos.

Ki ora bo por pidi esaki?

Bo por manda nos un mensahe si:

bo a bende òf parti e tereno;
e tereno ta di bo mes;
bo ta pensa ku no a kalkulá e suma bon.

Den kaso di benta òf partimentu bo ta manda tambe un kopia di e akta di notario òf un komprobante di Kadaster.

Kon bo por pidi esaki?

Asin’aki bo partisipá, ku bo no ta di akuerdo ku e faktura:

Bo ta manda un karta òf e-mail.
Bo por hasi esaki pa medio di:
- Entrega di e karta na bali di Departamento di Finansa, òf
- Manda un e-mail ku aneksonan pa belasting-olb@bonairegov.com

Pone den bo karta òf e-mail:

bo nòmber
bo adrès kompletu
bo number di CRIB
number di e ‘aanslag’
referensia di pago
number di e tereno (number di parsela)
e fecha ku tin riba faktura
e fecha ku ta skirbi e karta òf e-mail
un splikashon kla, dikon bo no ta di akuerdo ku e faktura
un kopia di e faktura

Bo tin prueba? Manda esakinan tambe.
Bo ta skirbi pa un otro persona? Manda e ora ei un karta, den kua tin pará ku bo ta outorisá.

Ku ken bo por tuma kontakto?

Departamentu di Finansa
Adrès: Kaya Industria Pariba 28
Telefòn: (+599) 715 5330
E-mail: belasting-olb@bonairegov.com

Orario di servisio
Djaluna te ku djabièrnè: 08:00 or – 11:45 or
14:00 or – 16:00 or

Kuantu tempu e ta tuma?

Bo ta risibí un reakshon mas rápido posibel.
Kon largu esaki ta dura, ta dependé di bo situashon i si tur dato ta korekto.

Bo no ta di akuerdo ku e desishon?

Bo no ta di akuerdo ku nos reakshon?
E ora ei bo por dal un siguiente paso.
Den nos karta tin pará kiko bo por hasi e ora ei.

Kiko nos ta hasi ku bo datonan personal?

Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.

Den e Lei Protekshon di dato personal BES tin skirbí kon Entidat Públiko Boneiru mester hasi esaki.

E reglanan mas prinsipal ta :

Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
Nan ta registrá i prosesá bo datonan di forma seif, konfidenshal i kouteloso.
Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
No ta warda bo datonan mas largu di loke ta nesesario pa e petishon òf loke bo a mèldu.
Otro organisashon ta haña bo datonan solamente si esei mester segun lei.
Bo por puntra pa kua fin ta usa bo datonan i kiko ta hasi ku nan.