For di promé di yüni 2022 no ta permití pa bende ni duna tas di plèstik, pipa, palito di plèstik pa drei i tampoko , kuchú, fòrki i kuchara di plèstik na Boneiru.
For di promé di ougùstùs 2022 e prohibishon aki ta konta tambe pa baki di fom pa pone kuminda den dje. Kompanianan por kaba ku nan stòk durante e periodo di transishon.
Gradualmente lo amplia e produktonan prohibí di plèstik desechabel. Den e fase aktual esakinan ta saku, pipa pa bebe kuné i fòrki, kuchú i kuchara di plèstik i empake di stirofom pa kuminda. Selekshon di e produktonan akí ta basá riba sosten amplio bou di e partidonan konsultá. Manera negoshinan di benta por mayor, supermarket- i restorantnan, TCB, Duana i Selibon.
Entidat Públiko Boneiru ta aspirá un Boneiru mas limpi ku ménos shushi kantu di kaminda i den naturalesa pa un ambiente di biba mas salú. Ku e prohibishon akí nan ta spera di redusí e kantidat di plèstik desechabel na Boneiru. E kantidat grandi di plèstik desechabel den laman i riba tera ta oumentando tur aña ainda. Esaki ta dañino pa nos medio ambiente. Un Boneiru liber di plèstik ta saludabel pa su habitantenan, krusial pa medio ambiente, atraktivo pa turismo i ku esei bon pa ekonomia.
Resientemente diputado Kroon a presentá e ordenansa ku ta kontené e prohibishon di plèstik desechabel den Konseho Insular. Konseho Insular a bai di akuerdo ku e ordenansa insular pa prohibí plèstik desechabel (plèstik di un solo uso) seis luna despues di nan aprobashon. E prohibishon ta enfoká riba benta i suministro di plèstik desechabel.
Dentro di poko ta kuminsá un kampaña di informashon kaminda Entidat Públiko Boneiru lo kompartí mas informashon ku empresarionan i habitantenan.
