Dia 21 di mei e ‘International Panel on Deltas Coasts and Islands – IPDC’ a emití un rapòrt importante tokante kon islanan ta anda ku kambio di klima. Tur isla den Reino Hulandes a koperá ku esaki. E rapòrt akí ta mustra kon e islanan ta traha huntu pa ta mihó prepará pa e konsekuensianan di klima i pa bira mas sostenibel.
A formulá e rapòrt ku kontribushon di Aruba, Kòrsou, Sint Maarten, Boneiru, Sint Eustatius i Saba. E ta ofresé un imágen kla di e desafionan ku e islanan akí ta eksperensiá debí na kambio di klima i kiko nan ta hasi pa solushoná esakinan.
IPDC ta un kolaborashon di gobièrnunan, bankonan, sientífikonan i ekspertonan rònt mundu. E meta ta pa pone awa sentral den kaso di solushonnan pa kambio di klima i pa sòru ku debidamente ta ehekutá tur plan. E meta ta tambe pa eliminá barera i sòru pa bon palabrashon, konosementu i akseso na medionan finansiero pa realisá e plannan.
“Kambio di klima ta un desafio grandi, pero IPDC ta yuda nos pa huntu haña solushonnan ku ta kontribuí tambe na un futuro sostenibel”, segun Timo Kelder, kordinadó di IPDC pa área karibense.
Diputado Anjelica Cicilia di Boneiru ta añadí na esaki: “Pa medio di traha huntu i kompartí konosementu, nos por pone vários paso den direkshon di un futuro mas sostenibel. E rapòrt akí ta un paso importante den e proseso ei. Esaki ta nifiká un impulso èkstra tambe, banda di e trabou ku ya kaba nos ta hasiendo den kuadro di e plan di maneho pa naturalesa i medio ambiente.”
E rapòrt ta trata e desafionan úniko di kada isla i kua ta e plannan pa anda ku esakinan. Por ehèmpel mehorashon di suministro di awa, uso di energia sostenibel, fortifikashon di protekshon di kosta i konservashon di biodiversidat. E ta duna un bista general kompleto di tur e esfuersonan pa edifiká komunidatnan fuerte i resiliente.
E rapòrt ta pone énfasis riba kon importante ta pa traha huntu riba nivel internashonal i pa enbolbí komunidatnan lokal ku atendementu ku kambio di klima. Pa medio di traha huntu riba tur nivel, for di gobièrnunan lokal te organisashonnan internashonal, nos por tuma e medidanan ku ta hasi nos islanan mas fuerte i ku ta protehá futuro di nos komunidatnan.
