Tin ora nos ta lubidá kuantu naturalesa ta nifiká pa nos. Pero sin ref di koral salú, sin aire limpi i sin tera fértil no tin futuro. Pa e motibu akí entidat públiko Boneiru dia 30 di sèptèmber ta ranka sali ku e kampaña ‘Nos ta biba di naturalesa’.
E kampaña ta mustra kon fuertemente nos ta konektá ku naturalesa na Boneiru. Sea ku bo ta traha den kunuku, òf bo ta piska na kosta òf bo ta kana den mondi: tur kaminda naturalesa ta rònt di nos. I nos mes ta responsabel p’e. “Naturalesa no ta solamente bunita pa wak. E ta duna nos kuminda, trankilidat i protekshon tambe. E konsientisashon akí nos ke fortifiká,” segun e mènedjer di programa di e Plan di Maneho di Naturalesa i Medio Ambiente.
Visibel riba kaya i online
E kampaña ta dura te fin di aña 2026 i por mir’é riba vários pantaya digital kantu di kaminda, den supermarket, riba medionan sosial i den korant. E imágennan ta laga nos mira naturalesa di Boneiru manera e ta di bèrdat: fuerte, vulnerabel i di nos tur. Tur e ekspreshonnan ta karga e logo di kampaña ku e lema rekonosibel Nos ta biba di naturalesa.
Wèpsait nobo: naturalesabonaire.com
Huntu ku e kampaña, un wèpsait nobo tambe ta bai ‘live’: www.naturalesabonaire.com. Akí bo ta lesa tur kos tokante naturalesa i medio ambiente di Boneiru, proyektonan ku ta andando i kon bo mes por aportá.
Partisipá ku e akshon di video
For di 13 di òktober un akshon spesial di video ta ranka sali. Ta invitá tur habitante di Boneiru pa mustra kon nan ta ‘biba di naturalesa’. Post bo video riba medionan sosial, ‘tag’ e página di Facebook di e kampaña i duna nos un ‘like’. Solamente partisipantenan ku ta sigui i ‘tag’ e página, tin chèns pa gana un pakete di premio. E kuater videonan ku haña mas tantu ‘like’ ta keda premiá. Mas informashon bo ta haña dentro di poko riba: facebook.com/NTBDN
Partisipá i keda konektá
Sigui nos riba Facebook (facebook.com/NTBDN) i youtube (@NaturalesaBonaire). Deskubri hopi storia, informashon, wak huntu ku nos i keda na altura di tur kos ku huntu nos ta hasi pa naturalesa.
Tur dia nos naturalesa ta kuida nos. Laga nos huntu sigui kuid’é bèk. Nos ta biba di naturalesa.
