Dia 1 di òktober e Dia Internashonal di Hende Grandi anual a tuma lugá. Na Boneiru tambe nos a dediká hopi atenshon na esaki. Riba e dia spesial akí huntu ku nos hende grandinan nos a selebrá e previlegio di tin nan serka nos.
Nos hende grandinan ta kontribuí na nos komunidat, pasobra nan ta trese sabiduria i eksperensia di bida balioso. Dia 1 di òktober nos ta para ketu na e kontribushonnan enorme ku nan ta duna, no solamente den sírkulo familiar, pero pafó di esaki tambe. Por ehèmpel komo boluntario den sentro di bario, komo mèntòr pa hòbennan pa medio di kompartí nan konosementu profeshonal, i komo kargadó di kultura i patrimonio di Boneiru.
Direktorado di Komunidat i Kuido ta boga pa nos hende grandinan den bon salú por sigui partisipá den nos komunidat. E punto di salida ta ku nos hende grandinan ta sinti nan mes enbolbí, apresiá i respetá.
Direktorado di Komunidat i Kuido ta traha huntu ku Sentro Akseso, Zorg & Welzijn Groep, Fundashon Mariadal, Fundashon Alzheimer Bonaire, Fundashon ‘Mantelzorg’ Boneiru i Fundashon Konsulta pa Grandinan riba bienestar i felisidat di nos hende grandinan i ta hasi lo siguiente posibel:
- aktividat i sosten den sentronan di bario;
- informashon i edukashon;
- posibilidat pa nos hende grandinan mes organisá nan aktividatnan;
- un lokèt (Lokèt Aksesibel), kaminda for di e aña akí nos hende grandinan por akudí pa informashon i yudansa na momentu ku nan tin mester di esaki.
Nos a selebrá e Dia di Hende Grandi akí ku hopi aktividat dibertido, ku diferente organisashon a organisá. Tabatin músika, baile i komementu.
Na diferente sitio Direktorado di Komunidat i Kuido a entregá regalito na nos hende grandinan. Entre otro na fisioterapia i logopedia, pero tambe na kas serka e hende grandinan.
Riba djabièrnè tambe tin vários aktividat festivo mas di algun organisashon di hende grandi.
Boneiru, dia 1 di òktober nos ta pone nos hende grandinan na un manera spesial den spòtlait Pero ta bon pa tur dia nos eksperensiá e previlegio di tin un hende grandi den nos bida.
