Durante e promé rònt di Bario Limpi 2026 a rekohé en total 45,9 tòn di sushi. For di djabièrnè 18 te ku djadumingu 20 di sèptèmber den 12 bario di Boneiru tabatin kònteiner di sushi kaminda habitantenan por a entregá nan sushi gròf i sushi di riba kaya. E akshon a klousurá ku World Cleanup Day – Dia Mundial di Limpiesa, e dia ku mundialmente hendenan ta tene limpiesa den nan bisindario.
Entidat Públiko Boneiru i Selibon NV ta wak bèk positivamente. Ku 45,9 tòn di sushi, e habitantenan huntu a duna un aporte importante na barionan mas limpi i ménos dùmpmentu ilegal di sushi.
“Kada tòn ku nan depositá den un kònteiner, no ta resultá kantu di kaminda òf den naturalesa,” segun Sherman Blanken, hefe di departamento di Proyekto i Taskforce na Direktorado di Supervishon i Mantenshon di Lei. “Ku Bario Limpi nos ta sòru pa ta mas fásil pa nos habitantenan aktua adekuadamente. Na mes momentu nos ta sigui kontrolá pa loke ta trata dùmpmentu ilegal, pasobra esun ku laga sushi atras den naturalesa, ta hasi daño na henter nos isla.”
“Un bario limpi no ta kuminsá ku un kònteiner, pero ku komportashon di kada hende,” segun Clinton Kirindongo, mènedjer di Relashon ku Kliente i Komunikashon di Selibon NV. “Nos ta spera ku despues di e wikènt akí tambe nos habitantenan ta sigui anda konsientemente ku nan sushi.
Nos ta gradisí tur habitante, Selibon NV i tur hende ku a kontribuí na organisashon i ehekushon di e akshon di rekohementu di sushi. E siguiente rònt di Bario Limpi ta tuma lugá den luna di desèmber. Despues nos ta anunsiá e fechanan eksakto. Nos ta supliká tur hende pa tira sushi afó na e manera korekto i nunka no dùmp kos den forma ilegal kantu di kaminda òf den naturalesa. Di e manera akí huntu nos ta tene nos barionan i nos isla limpi.
Bario Limpi. Nos bario, nos responsabilidat.
