Despues di un tremendo selebrashon dia 1 di yanüari, yen di alegria i gratitut nos ta wak bèk riba Dia di Maskarada 2023. Tabata un dia kaminda nos komunidat a bini huntu pa selebrá nos tradishonnan riku i pa krea rekuerdonan ku lo dura un bida largu.
Un Patrimonio Bibu: Dia di Maskarada 2024
Dia di Maskarada, un tradishon di hopi siglo bieu, ku tabata na punto di bai pèrdì, a prueba un biaha mas di ta un patrimonio bibu ku tin su raisnan profundo den nos kultura. E sonido alegre di músika di Maskarada a yena nos kayanan, kaminda e sinfonia i e tambú di dòbel banda, konosí komo tambor, a determiná e ambiente.
Apertura inspirativo di parti di Ingrid Sealy
E punto kulminante di e dia a tuma lugá na SKAL, kaminda nos gezaghèber interino remplasante Ingrid Sealy a kompartí un palabra inspirativo di apertura. E entrega simbóliko di e butishi ku ròm, un tradishon ku tin su raisnan profundo den historia di Maskarada, a pone énfasis riba e konekshon ku nos kultura lokal.
Skèch i dibertishon na enkargo di e Maskanan
E orguyoso miembronan di e Grupo di Maskarada, e Maskanan, a brinda skèchnan vibrante ku tabata varia di esenanan humorístiko tokante toriamentu di toro te storianan emoshonante tokante e bida di piskadó. E presentashonnan akí no a trese solamente dibertishon, pero nan a fortifiká tambe e lasonan den nos komunidat.
Danki na nos komunidat
E éksito di Dia di Maskarada ta danki na e enbolbimentu i partisipashon entusiasmá di nos komunidat. Huntu nos a krea un dia yen di alegria i solidaridat, kaminda nos a mantené nos tradishonnan bibu i krea rekuerdonan nobo.
Un bista padilanti
Ku e rekuerdonan kaluroso di e Dia di Maskarada akí, awor nos ta wak padilanti den direkshon di futuro. Laga nos sigui traha huntu riba mantenshon di nos tradishonnan i fortifikashon di e laso úniko ku ta karakterisá nos komunidat.
