Gezaghèber di Boneiru, John Soliano, a partisipá na e di 21 Foro di e Paisnan i Teritorionan Ultramar i Union Oropeo (OCT-EU) na Aruba, ku nan a tene for di 9 te ku 14 di aprel 2026. Durante e foro akí representantenan di e Paisnan i Teritorionan Ultramar (Overseas Countries and Territories – OCT’s), Union Oropeo i mundo empresarial a bini huntu pa deliberá tokante kolaborashon i desafionan konhunto.
Den su kontribushon, gezaghèber a aksentuá importansia di e kolaborashon duradero i di largo plazo entre Boneiru, e Paisnan i Teritorionan Ultramar i Union Oropeo. “Den un mundu ku kada biaha ta mas mutuamente konektá, e kolaborashon akí a resultá di ta di gran balor. Pa medio di diálogo i kolaborashon dirigí, nos ta fortifiká nos kapasidat pa atendé ku desafionan konhunto,” segun Soliano.
Durante e foro nan a para entre otro ketu na vários tema importante, manera siguridat di energia, kambio di klima, resiliensia ekonómiko i konektividat. Pa Boneiru partikularmente transishon di energia ta di importansia stratégiko. Gezaghèber a enfatisá ku e traspaso pa energia limpi, konfiabel i pagabel no ta un eskoho, pero un nesesidat.
Banda di esaki el a aksentuá importansia di invershon den infrastruktura marítimo i digital, i alabes e desaroyo mas aleu di proyektonan inovativo manera e Stashon di Galileo. E inisiativanan akí ta aportá na diversifikashon ekonómiko i na kreamentu di empleo di balor haltu na Boneiru.
Gezaghèber a ekspresá e deseo ku den e periodo binidero e proyektonan ku a papia tokante di nan lo keda konkretisá mas aleu: “Ta di gran importansia ku no solamente e plannan akí ta keda elaborá, pero ku debidamente nan ta keda formalisá i finansiá tambe.”
Finalmente el a pone énfasis riba importansia di kontinuashon i fortifikashon di e kolaborashon ku Union Oropeo i e partnernan for di e Paisnan i Teritorionan Ultramar. “Nos futuro konhunto ta rekerí solidaridat i akshon koordiná. Ku konfiansa Boneiru ta spera un profundashon mas aleu di e kolaborashon balioso akí.”
