For di 7 di mart te ku 23 di aprel 2026 e proyekto pa hóben The Next Wave ta tumando lugá. E proyekto akí ta yuda hóbennan na Boneiru pa siña mas tokante salú, kuminda i empresariado. Entidat Públiko Boneiru, GGD Boneiru / Salubridat Públiko ta ehekutá e proyekto akí ku hóbennan, empleadonan di Jong Bonaire i personal di kushina di Scholengemeenschap Bonaire (SGB).
E proyekto The Next Wave ta kombiná teoria i práktika. Hóbennan, empleadonan di Jong Bonaire i personal di kushina di SGB ta siña kiko ta kuminda saludabel, kon nan por traha pasaboka saludabel i dikon esaki ta importante. Tambe e hóbennan ta desaroyá vários abilidat riba tereno di ‘branding’ i benta. Durante e proyekto ta ofresé e hóbennan fruta tambe komo èkstra stimulashon di un estilo di bida saludabel.
E proyekto ta konsistí di kuater parti, esakinan ta:
Cook Up: empleadonan di Jong Bonaire i personal di kushina di SGB ta haña treinen di un shèfkòk. Nan ta siña kon nan por prepará kuminda saludabel i pagabel.
Level up: e hóbennan ta haña lès serka ekspertonan, manera un dòkter di kas, un sikólogo i algun dietista. Nan ta siña entre otro tokante supstansianan nutritivo, energia, hidratashon, lesa etiketa i influensia di kuminda riba deporte, soño i salú mental.
Fire up: e hóbennan mes ta drenta kushina. Nan ta prepará pasaboka i kos di bebe saludabel bou di guia di e personal entrená.
Show up: e hóbennan ta siña tokante ‘branding’, empake, preis i benta di produktonan saludabel.
E proyekto ke hasi mas ku solamente brinda konosementu i abilidat. E hóbennan ta siña tambe kon nan por inspirá otro hende. Di e manera akí nan ta krese di partisipante pa embahador di un estilo di bida saludabel.
Pa medio di trein hóbennan i empleadonan di Jong Bonaire òf personal di kushina di SGB huntu, The Next Wave ta traha riba un aserkamentu struktural di edukashon di salú na Boneiru. Meta di e proyekto ta pa siña hóbennan kon nan por hasi eskohonan mas saludabel den nan bida diario.
Hóbennan por partisipá grátis na e proyekto The Next Wave. Pa mas informashon, tuma kontakto ku Jong Bonaire via +599 717 4303 òf info@jongbonaire.org.
