Ta drecha kaminda den barionan di Boneiru

Aktualmente Entidat Públiko Boneiru ta trahando riba drechamentu di kaya den diferente bario. E kayanan ku nan ta trahando riba dje awor akí ta Kaya Luna, Kaya Solo, Kaya Strea, Kaya Venus, Kaya Saturnus i tambe e área rònt di Parke Plasa Chiku Goeloe. Ta pone klenku den e kayanan akí i nan ta haña asera. Entidat Públiko Boneiru, bou di guia di direktorado di Planifikashon i Desaroyo ta hasi esfuerso pa drecha infrastruktura di nos isla. E meta ta pa otro aña kaba ku renobashon di tur e kayanan planiá.

Na mes momentu tin trabou ta tumando lugá den diferente área i bario pa drecha kaminda i di e manera ei mehorá ambiente di biba i oumentá siguridat. Esaki ta forma parti di palabrashonnan i programanan anterior pa hasi Boneiru su infrastruktura mas konfiabel, mas duradero i mas seif. Aktualmente ta poniendo malchi den e kayanan menshoná pa traha rant di betòn, pa despues konstruí e kaya i e aseranan ku klenku. Kaya Strea i Kaya Solo ya kaba ta kompletamente renobá i awor Kaya Luna i Kaya Venus ta riba planifikashon.

Diputado Hennyson Thielman, responsabel pa direktorado di Planifikashon i Desaroyo, resientemente a hasi un bishita na e kayanan akí i meskos ku e abitantenan e tabata satisfecho tokante progreso di e trabounan. E ta entusiasmá tokante estado di e kayanan i e mehorashon ku e sistema nobo di pone klenku ta trese kuné. Esaki ta kontribuí na un mihó ambiente di biba pa e abitantenan. Diputado Thielman a enfatisá ku lo kontinuá ku e trabounan di mehorashon di infrastruktura den e añanan binidero, ku énfasis riba aksesibilidat, sostenibilidat i siguridat di e kamindanan na Boneiru. ‘E meta ta pa dentro di 5 aña kasi tur kaminda den barionan di Boneiru ta den un bon estado,’ segun e diputado.