Kaya Korona ta bai habri parsialmente

Pronto ta asina leu ku un parti di Kaya Korona, ku na e momentunan akí ta bou di rekonstrukshon, ta kla i lo habri. Diputado Hennyson Thielman, enkargá ku Desaroyo i Maneho di espasio i ku Tráfiko i Transporte, ta satisfecho ku e forma ku e trabounan den kuadro di ehekushon di e di dos fase di e proyekto pa drecha e kaya prinsipal akí, ta kanando.

E mandatario ta konsiente ku seramentu temporal di e ardu di tráfiko prinsipal akí pa por ehekutá e trabounan, ta kousando molèster. Kaya Korona ta esensial partikularmente den oranan di mainta pa tráfiko di kas pa trabou i pa hiba muchanan skol. Na e momentunan akí por mira i eksperensiá kon tráfiko ta pega i ta formando fila na e konekshon di Kaminda Djabou i Kaya Amsterdam,for di dia ku skolnan a habri.

P’esei gobièrnu di Boneiru ta hasi máksimo esfuerso, huntu ku e kontratista, pa e proyekto di Kaya Korona finalisá mas rápido posibel i asina aliviá e tráfiko atrobe.