Informashon tokante trabou pa konstruí un bahada pa hende ku limitashon

Na promé lugá entidat públiko Boneiru ta gradisí nos pueblo pa nan pasenshi relashoná ku konstrukshon di e bahada pa hende ku limitashon na Parke Tului. A tuma e promé pasonan pa realisá esaki. Ku e konstrukshon na Parke Tului,  nos a dal un stap importante pa hasi nos espasionan públiko mas aksesibel pa un i tur por hasi uso di nan. Den e último dianan por a mira ku STINAPA a pone algun blòki manera di Lego den laman. E blòkinan akí ta sirbi komo barera temporal pa wanta awa di laman durante e trabounan. Na final dje trabou ta kita nan atrobe. A diseñá e blòkinan akí di un material spesial pa nan no okashoná daño na nos koralnan.

Ta ferwagt ku lo kaba ku e trabounan promé ku Pasku. Te na e momento ei, ratu ratu e kaya enfrente Parke Tului lo ta temporalmente será. Nos ta komprendé ku seramentu temporal di kaya por sòru pa inkumbiniensia. P’esei nos lo hasi tur loke ta na nos alkanse pa limitá e molèster na un mínimo. Nos ta sòru pa informá komunidat na tempu.