Dama i kabayeronan, apresiabel presentenan,
Awe nos a bini huntu aki, den silensio, pa konmemorá.
Nos ta kòrda tur esnan ku a entregá (sakrifiká) nan bida pa nos libertat.
Libertat ku ochenta aña despues di liberashon nos tin mag di tesorá ainda.
Ochenta aña di libertat.
Pero libertat ta vulnerabel. I libertat nunka no ta di mes.
Nos ta biba den un tempu kaminda nifikashon di libertat ta palpabel atrobe den aktualidat.
Guera, konflikto, eksklushon, tin biaha nan ta parse di ta masha leu, pero nan ta kuminsá di aserka.
Libertat no ta bai pèrdí solamente debí na violensia di arma. Libertat ta garna asina ku ekskluí hende, diskriminá nan òf kalifiká nan komo inferior por ehèmpel.Konflikto ta kuminsá hopi biaha den chikí : ku palabra, imágen, ku e pensamentu di nos kontra nan. Nos komo un komunidat chikí no ta inmune pa esaki tampoko. Ta solamente ku konsientisashon di impakto di esaki, nos lo por wak nos komunidat i nos próhimo ku un brel di inklusividat.
P’esei awe mi ke dirigí mi mes spesialmente na nos hubentut. Pa hopi hende 4 di mei ta parse kisas un akontesimentu di otro tempu, un kapítulo for di bukinan di historia.
Pero e peligernan ku ta menasá libertat no a disparsé i nan ta ful visibel atrobe.
Nan tei ainda – online tambe. Via medionan sosial pensamentunan por plama manera welek. Ta alimentá polarisashon via posts, reels i stories.
Propaganda no ta algu di pasado, di poster i flayernan.
E ta di awe, visibel riba nos selular i pantayanan, tur dia.
P’esei embolbimentu di hóbennan ta mas importante ku nunka pa garantisá pensamentu i e fundeshi di un sosiedat liber pa futuro.
Boso tin e forsa (poder) pa keda pensa krítiko.
Pa no tuma ofer sin mas loke ta kompartí.
Pa skohe pa rèspèt, pa konekshon, pa humanidat.
Libertat ta eksigí esfuerso, kada dia. (tur dia di nobo)
No solamente di esnan ku a bai nos dilanti, pero di nos tambe, i di boso tambe.
Awe nos ta konmemorá e sakrifisionan hasí.
Awe nos ta para ketu na ochenta aña di libertat.
I awe nos ta ekspresá e deseo pa e dékadanan benidero tambe nos tin mag di sigui biba den libertat.
Ku huntu nos por sigui konstruí un sosiedat kaminda libertat, rèspèt i konekshon ta pará sentral.
Laga nos ta huntu den silensio.
Laga nos konmemorá huntu.
I laga nos traha huntu pa un sosiedat kaminda libertat ta sigui eksistí – pa tur hende.
Danki.
