Gezaghèber di Boneiru a stipulá e maneho nobo di arma di kandela. Ku implementashon di e maneho akí, e paro temporal pa loke ta trata petishon nobo pa un pèrmit pa arma di kandela ta keda anulá. Habitantenan por entregá un petishon atrobe pa importá, eksportá òf poseé un arma di kandela pa metanan pèrmití. Na mes momentu ta implementá kondishonnan mas estrikto pa fortifiká poseshon responsabel di arma di kandela i siguridat na Boneiru mas aleu.
E maneho di arma di kandela a keda realisá despues di konsultashon ku stakeholdernan i el a keda sinkronisá ku e partnernan den e Triángulo Boneiru. E maneho ta enfoká riba regulashon di poseshon di arma di kandela ku pèrmit i e no ta intenshoná pa atendé ku e problemátika di arma di kandela ilegal.
Kondishonnan nobo di siguridat
Pa oumentá siguridat, for di awor tin kondishonnan adishonal na vigor pa hasi petishon pa un pèrmit di arma di kandela. E personanan ku ta hasi petishon entre otro mester:
entregá un deklarashon médiko di tantu nan dòkter di kas komo di un optometrista;
komprobá ku nan tin sufisiente konosementu di arma di kandela i ku nan por anda na un manera seif ku esakinan, pa medio di un deklarashon di e asosiashon di tiru òf di polis;
kumpli ku e reglanan pa e tipo di arma di kandela i e munishon ku ta pèrmití pa e meta pa kua a hasi petishon.
Banda di esaki e maneho ta kontené tambe instrukshon pa skopèt di aire, arma di ‘airsoft’ i arma di ‘paintball’, pa evitá maluso di e ophetonan akí.
Hasi petishon ta posibel atrobe
Ku stipulashon di e maneho, e paro temporal pa loke ta trata petishon nobo a keda anulá. Habitantenan ku ke hasi petishon pa un pèrmit pa arma di kandela pa un meta ku ta pèrmití pa esaki, por entregá nan petishon na Gabinete di Gezaghèber via wapenmachtiging@bonairegov.com. Ta evaluá petishonnan nobo a base di e maneho nobo.
Un pèrmit pa arma di kandela ta bálido pa un (1) aña i mester prolongá esaki tur aña. Por entregá petishon pa prolongashon pa pèrmit personal i general eksistente entre 1 di sèptèmber i 15 di òktober 2026. No ta tuma petishon ku a keda entregá despues di 15 di òktober den tratamentu mas.
E proseso pa hasi petishon
Pa mehorá e servisio, di awor en adelante habitantenan por entregá e petishon pa un Deklarashon tokante Kondukta (VOG) i e petishon pa un pèrmit pa arma di kandela na mes momentu na Gabinete di Gezaghèber. Ta evaluá e Deklarashon tokante Kondukta (VOG) promé. Den kaso di un evaluashon positivo ta tuma e petishon pa e pèrmit pa arma di kandela outomátikamente den tratamentu mas aleu.
Entregá arma di kandela na tempu
Den kolaborashon ku polis, ta intensivá e supervishon i mantenshon di lei pa loke ta trata e kondishonnan pa un pèrmit di arma di kandela. Pa e motibu akí personanan ku ta poseé un arma di kandela sin un pèrmit bálido pa arma di kandela, òf ku tin un pèrmit ku a kaduká, ta haña oportunidat pa entregá nan arma di kandela te ku 31 di ougùstùs 2026 na polis.
Despues di e fecha akí, personanan ku nan haña ku un arma di kandela sin un pèrmit bálido pa arma di kandela, ta kore riesgo pa persekushon penal di parti di Ministerio Públiko. Pa traha un sita pa entregá un arma di kandela, por tuma kontakto ku Kuerpo Polisial Hulanda Karibense via +599 715 8000.
Mas informashon
Mas informashon tokante e maneho di arma di kandela ta disponibel via wèpsait di Entidat Públiko Boneiru. Pa pregunta, habitantenan por tuma kontakto ku Gabinete di Gezaghèber via wapenmachtiging@bonairegov.com òf via telefòn +599 715 5330.
