Durante selebrashon di Dia di Rincon dia 28, 29 i 30 di aprel e kampañanan Sali Seif i Yega Seif ta uni forsa den un solo mensahe kla i raspá: gosa, pero yega kas bèk na un manera seif tambe. Bou di e nòmber konhunto “Sali i yega seif”, nan ta pidi èkstra atenshon pa komportashon responsabel, tantu ora di salimentu komo den tráfiko.
Diferente ‘gadget’ i visibilidat durante Dia di Rincon
Durante e festividatnan nan ta parti diferente ‘gadget’ pa fiha atenshon riba e mensahe di selebrá i yega kas bèk na un manera seif. Ku esaki Entidat Públiko Boneiru, den un forma aksesibel i rekonosibel, ke drenta den kontakto ku públiko i engrandesé konsientisashon.
Karanan konosí di e kampaña di tráfiko
E kampaña di tráfiko Yega Seif ta hasi uso di tres karakter konosí: Mamai, Hèlmpi i Kapitan. E personahenan akí na un manera aksesibel i kultural ta duna bida na siguridat den tráfiko.
- Mamai ta para pa sabiduria i responsabilidat
- Hèlmpi ta hasi siguridat agradabel i visibel, spesialmente pa nos hóbennan
- Kapitan ta simbolisá e shofùr konsiente ku no ta bebe i ku ta hiba otronan kas na un manera sigur
Pa medio di nan storianan, nan ta sòru pa eskoho importante den tráfiko bira algu rekonosibel ku tur hende na Boneiru por papia tokante di dje.
Sali Seif
Sali Seif ta bai tokante buska dibertishon na un manera seif i e tin komo meta pa yuda nos habitantenan hasi eskoho konsiente i seif. Den e periodo di Dia di Rincon, gustosamente nos ke dediká atenshon na prevenshon di kalor i zonido. Pa e motibu akí GGD Boneiru ta bai parti wairu i dòpi reusabel pa orea. Riba djamars 28 di aprel nos ta pone dòpi pa orea disponibel pa e parada di mucha. Dia 29 i 30 di aprel bo por akudí na nos stènt pa nos ‘gadget’-nan i pa mas informashon tokante e tópikonan akí.
Dikon ‘Sali Seif’ i ‘Yega Seif’ ta traha huntu
Salimentu i tráfiko ta inseparablemente konektá ku otro, sigur durante un evento grandi manera Dia di Rincon. Kaminda Sali Seif ta enfoká riba gosa na un manera seif i responsabel durante salimentu, Yega Seif su enfoke ta riba komportashon seif den tráfiko. Pa medio di traha huntu, ta surgi un solo mensahe fuerte i kontinuo: for di e momentu ku bo sali fo’i kas, te na momentu ku bo yega kas bèk atrobe.
E kolaborashon akí ta aksentuá ku siguridat no ta stòp na fiesta, pero ku netamente despues di fiesta e ta di gran importansia. E meta ta pa redusí riesgo i sòru pa tur hende por partisipá na un manera seif na e festividatnan i yega kas bèk seif atrobe.
Kiko abo por hasi?
Tur hende por kontribuí na un Dia di Rincon seif. P’esei bo mester hasi eskoho konsiente:
- No kore outo bou di influensia di alkohòl òf droga
- Bebe sufisiente awa. Palabrá adelantá ken no ta bebe alkohòl, pues ken lo ta Kapitan
- Kompartí outo ku amigu òf famia
- Hasi uso di transporte ku bùs òf taksi
- Tira bista pa otro i hala atenshon di otro riba komportashon ku no ta seif
- Sòru pa freskura, bo por akudí na nos stènt pa un wairu tambe
- Protehá bo oido ora tin músika duru i buska dòpi pa orea na nos stènt
- Pone bo telefòn un banda ora bo ta kore outo
Huntu nos ta sòru pa tur hende yega kas sano i salvo atrobe.
Gosa, pero na un manera seif
Dia di Rincon ta un momentu di orguyo, kultura i konektividat. Laga nos gosa huntu di músika, tradishon i bon ambiente, ku bista pa otro i pa nos siguridat.
Sali i yega seif – pasobra ta te ora tur hende ta bèk na kas seif, un fiesta eksitoso a kaba.
