Dia 30 di yanüari 2023 ta selektá e votadónan ku tin mag di vota pa elekshon di Konseho Insular i elekshon di Kolegio Elektoral dia 15 di mart binidero.
- Ta manda bo karchi di vota na e adrès kaminda dia 30 di yanüari bo ta inskribí segun atministrashon básiko. Pues si bo a muda, sòru pa bo adrès ta registrá korektamente i na tempu den atministrashon básiko, esta pa mas tardá 30 di yanüari 2023, pa medio di mèldu bo mudansa na Registro Sivil.
- No lubidá ku mester tin un buson (brievenbus) pa risibí e karchinan di vota ku nos ta manda via pòst.
- Riba dia di elekshon bo mester por mustra un reibeweis, ID, sédula òf pasport hulandes ku no ta kaduká pa mas ku sinku aña na e urna elektoral. Kontrolá si bo tin bo ID (sédula òf pasport) ainda, sino mas pronto posibel bo tin ku pidi un ID nobo. Esaki pa prevení ku bo no por vota, pa motibu ku bo ID nobo no ta kla ainda debí na hopi okupashon.
En breve: sòru komo persona ku derecho di voto pa dia 30 di yanüari 2023 bo datonan di adrès ta korektamente registrá den atministrashon básiko i ku tin un buson (brievenbus) presente ku ta aksesibel i fásil pa haña na bo adrès, i chèk si bo ID ta bálido riba dia di elekshon (òf ku el a kaduká pa maksimalmente sinku aña). Sin ID bo no por vota.
Hendenan ku tin derecho di voto pa elekshon di Konseho Insular ta hendenan ku riba dia di postulashon di kandidato ta residente di Boneiru i ku riba dia di elekshon, 15 di mart 2023, tin 18 aña òf mas. Residentenan ku no tin nashonalidat hulandes mester tin un pèrmit di estadia bálido pa nan tin derecho di voto. Hendenan ku tin derecho di voto pa elekshon di kolegio elektoral ta hendenan ku nashonalidat hulandes, ku riba dia di postulashon di kandidato ta residente di Boneiru i riba dia di elekshon, 15 di mart 2023, tin 18 aña òf mas.
Bo tin duda tokante e echo ku bo ta registrá komo votadó? E ora ei bo por akudí na departamento di Registro Sivil pa kontrolá si bo ta registrá komo votadó. Ta resultá ku esaki no ta e kaso pero bo ta kere sí ku bo ta kumpli ku e kriterionan stipulá? E ora ei bo por entregá un súplika pa revishon di bo registrashon komo persona ku derecho di voto, kaminda bo por proba ku bo ta kumpli ku e kriterionan stipulá.
Mas informashon tokante elekshon bo por haña riba página di Facebook Gobièrnu di Boneiru i Boneiru ta vota òf e página di LinkedIn Entidat Públiko Boneiru. Ora ku despues di 30 di yanüari tur lista di kandidato ta konosí i a manda e karchinan di vota pa e hendenan ku derecho di voto, e wèpsait di elekshon lo ta aktualisá ku tur informashon tokante bentaha i nesesidat di votamentu.
