Gezaghèber a kompartí e rapòrt di rekonstrukshon di echo Santa Clara ku Konseho Insular.
Aña pasá den luna di novèmber a kuminsá ku e rekonstrukshon di echo. E motibu pa esaki tabata ku diferente pregunta tabata bini dilanti tokante e manera ku kosnan a kana pa ku toma di desishon den diferente kaso relashoná ku e área akí. Meta di e rekonstrukshon di echo tabata pa optené klaridat i konosementu tokante e echonan, e manera ku e prosesonan a kana i e toma di desishon dentro di e área di Santa Clara.
EBBEN Partners, un ofisina independiente di integridat ku ekspertisio amplio riba e tereno akí, a ehekutá e rekonstrukshon di echo.
Na un manera amplio e rapòrt ta wak e manera real ku kosnan a kana, relashoná ku e 4 kasonan ku a tuma lugá desde 2018 den e área di Santa Clara. Pa kada kaso a identifiká kiko realmente a tuma lugá i kua ta e aktornan ku tabata enbolbí ku esaki.
For di e rapòrt no a resultá ku tabatin kestion di intenshon malisioso, enrikesimentu propio òf otro iregularidat, pero sí ku tin algun punto di siñamentu i mehorashon. E rapòrt ta hasi diferente rekomendashon tokante mehorashon di proseso, maneho i strategia pa den futuro evitá tur (aparensia di) aktuashon atministrativo òf gubernamental no-íntegro den kaso di transakshonnan sensibel di tereno.
Ku entrega di e rapòrt, gezaghèber ta spera ku a duna mas klaridat tokante e echonan i e toma di desishon dentro di e área di Santa Clara.
E rapòrt ta disponibel riba wèpsait di entidat públiko Boneiru.
Het rapport is beschikbaar op de website van het openbaar lichaam Bonaire.
