Awe e edishon di primavera di Bon Biní Bonaire a sali. E revista, un edishon di gabinete di gezaghèber, tin komo meta pa informá relashonnan di Entidat Públiko Boneiru pafó di nos isla tokante desaroyonan aktual.
Den e edishon nobo, for di diferente punto di bista ta dediká atenshon na e konsekuensianan di kambio di klima pa Boneiru. Por ehèmpel dijkgraaf Pieper ku huntu ku un tim di eksperto a hasi vários rekomendashon pa mehorashon di maneho di awa, i direktor Palmen di Greenpeace Hulanda ta bini na palabra. E organisashon di naturalesa i medio ambiente ta preparando un kaso den korte pa imponé ku ministerionan ta hasi mas kos pa yuda Boneiru protehá su mes kontra subida di superfisie di laman.
Ta tira lus riba e tema siguridat den entrevista ku hefe di Kuerpo Polisial Hulanda Karibense sr Braaf i kwartiermaker i alabes hefe interino di e Sentro di Informashon Regional i Ekspertisio Hulanda Karibense sr Van Hees. Mas aleu empresarionan lokal ta konta kon nan a hasi un komienso eksitoso ku yudansa di e dunadó di mikrokrédito Qredits i den un kontribushon komo wéspet e ekonomista Van Buiren ta yama Boneiru un djamanta ku ta kresiendo. Ta duna atenshon tambe na modernisashon di Aeropuerto Flamingo, bishita di trabou di gobernantenan i ‘Leerorkest Bonaire’.
A reservá e kurason di e revista pa un impreshon kolorido di potrèt di e bishita ku Rei Willem-Alexander, Reina Máxima i prinsesa heredero Amalia a hasi na Boneiru. Bou di e título ‘E último’ gezaghèber Rijna den e prólogo ta papia tokante su despedida pa motibu di su nombrashon komo enviado spesial pa Hulanda Karibense pa fondonan di Union Oropeo, fondonan di Nashonnan Uní i relashonnan ekonómiko ku Amerika Latino.
