Proyekto “di Simia pa Produkto” ku “business coaching” pa empresarionan den e sektor di agrikultura

E proyekto “di Simia pa Produkto” ta yuda awor tambe ku “business coaching” (guia di negoshi) pa empresarionan den sektor di agrikultura. E meta ta pa duna guia na empresario eksistente i nobo den sektor di agrikultura tokante entre otro kon pa lanta un negoshi, kon pa manehá i/òf atministrá un negoshi, i duna guia pa skibi plan di negoshi. Un empresario eksistente i futuro empresario ku ta deseá esaki, por apliká pa risibí guia profeshonal ku ta konsistí di duna konseho i informashon durante e proseso pa establesé òf reinforsá un negoshi.

Pa por partisipá na e “Business Coaching” un empresario den ramo di agrikultura por apliká pa un di e tres opshonnan ku ta ofresé. E gastunan di e opshon ku skohe ta wòrdu kubri parsialmente dor di e proyekto 'di Simia pa Produkto’ di gobièrnu di Boneiru. E tres opshonnan ta:

• “Coaching” básiko operashon komersial;

“What is doing business” - Kiko ta enserá hasi negoshi.
Esaki ta kosta $250,- di kual gobièrnu ta kubri $150,-i persona ku a hasi petishon $100,-.

• Deskribí proseso òf manual di operashon di bo negoshi. Esaki ta kosta $350,- di kual gobièrnu ta kubri $250,- i persona ku a hasi petishon $100,-.
• Skibi plan di negoshi; Esaki ta kosta $450,- di kual gobièrnu ta kubri $350,- i persona ku a hasi petishon $100,-.

Pa kada opshon e (futuro) empresario ta paga solamente un montante fihó di $100,-.

Pa e formulario di aplikashon pa e insentivo “Business Coaching”, interesadonan por akudí na bali di unidat di Asuntunan Ekonómiko na Direktorado Planifikashon i Desaroyo, Departamentu di Maneho i Proyekto na Kaya Amsterdam # 21.

Pa kualke pregunta i/òf pa entregá e formulario yená, por tuma kontakto ku Edsel Cecilia na 717-5330 ekstenshon 5041 òf por manda un meil pa edsel.cecilia@bonairegov.com. Por tuma kontakto tambe ku Maurice Adriaens na 717-8836 òf por manda un meil na maurice.adriaens@bonairegov.com.

Pa mas informashon tokante di e insentivonan por sigui e página di Facebook “di Simia pa Produkto” òf por tuma kontakto ku Direktorado di Planifikashon i Desaroyo, unidat di Asuntunan Ekonómiko.