Hunta di Salubridat (Gezondheidsraad) a konsehá pa na e momentu akí no implementá un programa di bakunashon kontra dengue pa e parti karibense di Reino. Esaki ta nifiká ku por lo pronto no ta bin un programa general di bakunashon na Boneiru. Pero e konseho akí no ta nifiká ku bakunashon kontra dengue no ta posibel pa habitantenan di Boneiru. Habitantenan ku pa nan propio gastu ke pasa angua òf ku ke informashon tokante esaki, por traha un sita na departamento di GGD Bonaire / Salubridat Públiko di Entidat Públiko Boneiru.
E bakuna kontra dengue Qdenga® ta registrá na Oropa pa personanan di kuater aña bai ariba. Ta trata di un seri di 2 bakunashon ku 3 luna entre nan dos. Bakunashon ta posibel despues ku bo a haña tur informashon i e dòkter di GGD Bonaire no ta mira opheshon médiko. No ta nesesario pa investigá si bo a yega di haña dengue kaba.
Serka hende ku a yega di haña dengue, bakunashon por ofresé protekshon èkstra, pa motibu ku un di dos infekshon por ta mas grave ku esun di promé. Pa hende ku no a yega di haña dengue ainda, bakunashon tin bentaha i desbentaha. Durante e sita ta deliberá ku bo tokante esakinan. Na e okashon ei ta informá bo tambe ku posibelmente e bakuna ta protehá ménos bon kontra sierto variantenan di e vírùs di dengue i ku no ta eksaktamente konosí ainda kuantu tempu protekshon di e bakunashon ta dura.
Kombatimentu di sangura i prevenshon di piká di sangura ta keda e maneranan mas importante pa prevení dengue. Bakunashon por ta un protekshon èkstra pa sierto hendenan, pero e no ta remplasá e medidanan akí.
GGD Bonaire ta tene e situashon di dengue na Boneiru i na e paisnan i islanan rònt di nos bon na bista. Tambe GGD Bonaire ta sigui desaroyonan sientífiko. Di e manera akí semper bo por akudí serka GGD Bonaire pa un konseho korekto.
Pa traha un sita bo por yama 715 – 5324. Riba www.bonairegov.com/pa/sangura bo ta haña mas tep i kontesta riba pregunta tokante dengue.
