Den e simannan binidero Direktorado di Supervishon i Mantenshon di Lei di Entidat Públiko Boneiru ta ehekutá kontròl èkstra den vários supermarket. Di e manera akí e direktorado ta sòru pa tur habitante i bishitante por kumpra kuminda ku ta seif.
Mas habitante, mas demanda pa kuminda
Boneiru ta kresiendo rápidamente. E kantidat di habitante i turista ta oumentando i pa e motibu akí e demanda pa kuminda i kos di bebe a bira mas grandi. Supermarketnan a amplia nan oferta hopi. Esaki ta bon, pero e ta sòru pa mas riesgo tambe. Ta importante ku e produktonan ku nan ta bende ta seif i di bon kalidat.
Kiko nan no ta pèrmití pa bende?
Segun Lei di Kuminda BES ta prohibí pa bende produkto ku no ta seif òf ku ta dudoso.
Esaki ta nifiká ku no ta pèrmití pa bende entre otro:
- Produkto sin etikèt, sin fecha di produkshon, sin fecha di vensementu i sin preis.
- Produkto ku a pasa nan fecha, ku ta kibrá òf ku tin daño.
- Bleki ku ta machiká, frusá òf hinchá.
- Produkto ku beskein òf ku ta afektá di kualke otro manera.
E tipo di produktonan akí por ta peligroso pa salú.
Responsabilidat di tur hende
E promé responsabilidat ta serka e doño i e empleadonan di e supermarket. Nan mester sòru pa kumpli ku e reglanan. Direktorado di Supervishon i Mantenshon di Lei ta kontrolá si esaki ta tuma lugá debidamente. E konsumidó tambe tin su ròl. Tur hende mester tira bista bon riba e produkto promé ku e kumpr’é òf bai kuné.
‘Huntu nos ta sòru pa produktonan seif i bon den nos tiendanan. Esaki ta importante pa salú di nos tur,’ segun Direktorado di Supervishon i Mantenshon di Lei.
Kontròl den kada bario
Den e simannan binidero empleadonan di Direktorado di Supervishon i Mantenshon di Lei ta pasa tur supermarket na nos isla. Ta ehekutá e kontrolnan bario pa bario. Na e momentu akí e inspektornan ta aktivo den bario di Tera Kòrá.
