Dia 2 di desèmber Konseho Insular a aprobá e Ordenansa Insular indikashon di áreanan di riesgo di siguridat i vigilansia ku kámara. Ku e ordenansa nobo akí gezaghèber di Boneiru ta haña dos kompetensia pa mantené òrden públiko. Ta trata di e kompetensia pa indiká sierto áreanan komo área di riesgo di siguridat i pa instalá vigilansia ku kámara na sitionan públiko.
Salbaguardiá òrden públiko ta esensial pa siguridat i habitabilidat na Boneiru. E último lunanan e kantidat di notifikashon kaminda tabatin arma (di kandela) enbolbí a oumentá enormemente. E sifranan ta mustra un oumento alarmante den e kantidat di insidente violento ku arma (di kandela) ku a keda registrá:
• 2020: 35 delito
• 2021: 36 delito
• 2022: 56 delito
• 2023: 66 delito
• 2024: 101 delito (fecha di determinashon: 1 di desèmber)
Esaki ta nifiká un oumento di mas ku 53% kompará ku aña 2023. A resultá tambe ku mayoria biaha ta hóbennan ta enbolbí den e insidentenan akí.
Áreanan di riesgo di siguridat
Mirando e desaroyonan akí i e periodo binidero kaminda tin hopi aktividat i evento ta tuma lugá, gezaghèber despues di a konsultá ku fiskal i hefe di kuerpo polisial, a disidí pa indiká algun área komo área di riesgo di siguridat. Ta trata di áreanan kaminda insidente ku arma (di kandela) a yega di tuma lugá. E áreanan indiká ta un parti di Playa, un parti di Antriol Pabou, Antriol Pariba, Nikiboko, un parti di Nort’i Saliña i un parti di Tera Kòrá.
Den e áreanan di riesgo di siguridat indiká, fiskal ta outorisá pa duna òrdu pa listramentu preventivo. Esaki ta enserá ku pa durashon di e òrdu por listra tur hende, sin ku un sospecho ta rekerí pa esaki.
E indikashon di e áreanan di riesgo di siguridat ta konta pa un periodo di 1 luna, for di 20 di desèmber 2024 te ku 20 di yanüari 2025.
Bo enbolbimentu ta esensial pa efektividat di e medidanan akí. Pa e motibu akí nos ta apresiá bo komprenshon i koperashon, pasobra solamente huntu nos por edifiká un Boneiru mas seif.
Bo tin informashon ku bo ke kompartí òf bo ke mèldu un situashon sospechoso? E ora ei tuma kontakto ku polis via 715 8000 òf via e liña di tep anónimo 9310.
