Dia 15 di sèptèmber último entidat públiko Boneiru a reakshoná ofisialmente riba e konsultashon via internet pa e ‘Fiscale verzamelwet BES eilanden 2027’. Ku e lei akí gobièrnu di Reino ke renobá vários regla di impuesto pa Boneiru, Saba i Sint Eustatius i hasi nan mas komprendibel. E kambionan proponé ta afektá entre otro hotèlnan, empresanan, agrikultura, merkado di bibienda i empresarionan chikí. Entidat públiko Boneiru ta hasi un yamada riba Reino pa tuma e sugerensianan di e islanan BES na serio i huntu buska solushonnan ku ta kuadra ku e situashon lokal.
Kiko ta un konsultashon? Un konsultashon ta un ròndu públiko di partisipashon kaminda siudadanonan, empresanan i organisashonnan por duna nan opinion tokante proposishonnan di lei, promé ku stipulá esakinan definitivamente. Entidat públiko Boneiru ta haña importante pa hasi uso di e posibilidat akí, pa motibu ku di e manera akí e por trese interes di Boneiru i su habitantenan direktamente bou di atenshon serka ministerio di Finansa. Pa medio di reakshoná na tempu, entidat públiko Boneiru por ehersé influensia riba e legislashon final i sòru pa esaki konektá mihó ku e situashon lokal.
E puntonan mas importante di e reakshon di entidat públiko Boneiru:
- Hotèl: Entidat públiko Boneiru ta haña ku e oumento proponé di e impuesto riba propiedat inmóbil pa hotèl no ta sufisientemente supstansiá. Entidat públiko Boneiru ta hasi un yamada pa hasi mas investigashon promé ku implementá e medida akí.
- Agrikultura lokal: Entidat públiko Boneiru ta positivo tokante e eksonerashon di ABB pa produktonan di agrikultura lokal, pa motibu ku esaki ta kontribuí na kosto di bida mas abou i mas outosufisiensia.
- Merkado di bibienda: Entidat públiko Boneiru ta boga pa medida ku ta sostené hendenan ku pa promé biaha ta kumpra un kas, manera por ehèmpel un impuesto di traspaso mas abou pa bibienda pagabel.
- Entrega di pòst: Entidat públiko Boneiru ta atvertí ku no ta deseabel pa pèrmití ‘dwangschrift’ via pòst, debí na e servisio postal defisiente na nos islanan.
- Empresario chikí: Reglanan mas severo pa e asina yamá ‘gebruikelijk loon’ ta afektá prinsipalmente e empresarionan chikí vulnerabel. Entidat públiko Boneiru ta pidi pa normanan mas hustu i mas simpel.
- Outo di servisio: E reglanan aktual ta muchu kompleho. Huntu ku ministerio di Finansa, entidat públiko Boneiru ke buska solushonnan mas práktiko.
Lesa e reakshon kompleto di entidat públiko Boneiru akinan: https://bonairegov.com/pa/bestuur-organisatie/dokumento-publiko
