Den kuadro di kombatimentu di pobresa segun e plan di programa Trahando pa Prosperidat i Bienestar di Boneiru, Entidat Públiko Boneiru ta sigui traha riba maneranan kon pa yuda komunidat usa ménos koriente i baha gastu.
Entidat Públiko Boneiru i Fundashon Cas Boneriano ta lansa dos proyekto den luna di sèptèmber pa yuda hürdónan spar riba nan konsumo di koriente.
1. Kambio di pera di lus
Entrante 1 di sèptèmber pa 19 di sèptèmber 2025, algun tékniko lo pasa na diferente kas di Fundashon Cas Boneriano pa hasi e kambio. Ku pèrmit di e hürdó, e téknikonan lo kambia e peranan di lus mesora pa unu LED. E peranan ku lo kambia ta parti paden di e kas, pues den kamber, baño, kushina, sala i den gang. Si e kas tin lus LED kaba, lo evaluá si un kambio ta nesesario.
2. Análisis di konsumo di energia
Den e mes periodo (esta di 1 te 19 di sèptèmber 2025), algun tékniko lo bishitá algun kas di Fundashon Cas Boneriano pa hasi un inspekshon na e kas. Ku pèrmit di e hürdó di kas, lo hasi un inspekshon na e kas pa determiná si e kas ta kalifiká pa hasi un midimentu di koriente. Unabes determiná ku e kas ta kalifiká, lo instalá un aparato di midi koriente. E aparato aki lo registrá e konsumo di koriente di e kas pa 2 dia (48 ora). E resultadonan di e midimentu aki lo duna un mihó komprondementu di e promedio di konsumo di koriente na Boneiru i kua ta e akshonnan ku lo por tuma pa baha gastunan di koriente.
Pa tur dos proyekto, e hürdó no mester prepará òf hasi nada. E téknikonan mes lo sòru pa tur kos.
Bo ke partisipá pero bo no ta na kas?
Si bo ke partisipá pero bo no ta na kas, bo por tuma kontakto ku kordinadó di proyekto, señor David Lee Winklaar, na +599 770 6947, di djaluna pa djaweps, entre 10:00–12:00 i 14:00–16:00.
E inisiativanan aki ta forma parti di e proyekto “You've got the Power” kaminda Entidat Públiko Boneiru ta konsientisá komunidat kon pa usa ménos koriente i asina baha gastu.
