Entidat Públiko Boneiru a kuminsá ku un kampaña nobo di konsientisashon pa pidi atenshon pa bienestar di kachó. E kampaña ta pone énfasis riba responsabilidat di doño di kachó pa kuida nan bestianan bon i e ta kontribuí na un Boneiru ku mas kariño pa bestia.
E kampaña ta enfoká riba krea mas konsientisashon tokante e nesesidatnan básiko di kachó: sufisiente awa limpi, kuminda, refugio i sombra. Prinsipalmente durante dianan kalor ta importante pa kachó tur ora tin awa èkstra na nan disposishon. Banda di e nesesidatnan básiko físiko, kachó tin nesesidat tambe di atenshon, amor i moveshon. Traha tempu pa hunga i kana ku bo kachó ta esensial pa un bida salú i felis.
Responsabilidat di e doño
Ta rekordá tur doño di kachó ku semper nan ta responsabel pa komportashon di nan kachó. Daño òf molèster ku un kachó okashoná, ta kai bou di responsabilidat di e doño. Pa evitá aksidente i problema, Entidat Públiko Boneiru ta duna e siguiente konsehonan:
- Tene bo kachó seif den bo propio kurá i sòru pa e portanan di kurá ta bon será, tambe ora ta djis un ratu bo ta sali.
- No laga bo kachó kana lòs riba kaya.
- Bo kachó ta mará den kurá? E ora ei sòru pa e liña ta sufisiente largu, di manera ku bo kachó por move libremente.
- Duna bo kachó tur ora sufisiente awa, kuminda i sombra.
- Sòru tur dia pa moveshon: traha tempu pa sali un ratu ku bo kachó i ten’é semper na liña durante ku bo ta kana kuné.
Ku e kampaña akí Entidat Públiko Boneiru ke duna un señal positivo: huntu nos por sòru pa nos kachónan biba felis i salú na Boneiru. Si kada doño di kachó asumí su responsabilidat, nos isla ta bira mas bunita, ku mas siguridat i ku mas kariño pa bestia.
Bo kachó ta dependé di bo.
