Diskurso Pastor Marc Hooijschuur durante e seremonia di Konmemorashon 4 mei 2022

Krans 4-05-22

Krans 4-05-22

Mi ta kere ku nos tur a lanta for di soño.

Dos luna i piku pasá direpente, e guera na Ukraina a kuminsá.

Un guera kruel ku ta bisa nos: nos libertat ta hopi frágil.
Libertat NO ta un kos evidente. E por bai pèrdí.

P’esei mi ta kere e ta bon ku nos tin un dia manera awe.
E dia di “Dodenherdenking” plus mañan e “bevrijdingsdag”.

Un dia di konsientisashon.

Awe nos ta kòrda riba e hendenan ku a sakrifiká e kos mas presioso ku nan tabatin.
Nan a sakrifiká nan bida.
Di kon? Pa nos por biba den libertat.

Ken di nos lo ta hasié aworakí, ora nan ta pidi bo pa sakrifiká bo bida?
Pa bo bisiña por biba komo un hende liber…

Nunka nos no ta lubidá e hendenan ku a sakrifiká nan bida pa nos, pa mi, pa bo.
Pa nos por biba awendia manera nos ta biba.

Ku ta un bida den libertat.

Puntra un hende kiko ta importante den bo bida, kasi sigur nan ta kontesta bo ku: ta mi salú, mi famia, mi libertat.

Ta Martin Luther King ku a bisa: “Mi ta preferá pa mi ta un hende pober ku ta liber, riba pa mi ta un katibu ku ta riku.

Nos mundu a lanta for di soño.

Nos libertat por sobrebibí so ora nos ta respetá sierto límitenan.

Libertat NO ta nifiká: Laat de wind maar waaien, doe maar waar je zin in hebt…

Un libertat den un sentido apsoluto no ta eksistí.

Nos por bisa: Ora bo ta so, e ora ei bo ta liber.
I asta or abo ta so, bo NO ta liber.
Bo ta mara na bo kurpa, ku ta un kurpa pasahero.

Asina ku bo ta huntu ku un hende, bo no ta liber mas.
Bo mester tene kuenta kuné.
Bo ta buska: kiko ta e balornan ku nos ta kompartí?
Riba e pregunta ei, awendia e ta keda ketu.

Sin ‘verbondenheid’ e libertat ta bira un ‘jungle’.
Nos libertat ta bira un espasio friu, bashí, sin sentido.
Sin e kualidat di ‘verbondenheid’, nos libertat ta bira un espasio di zundramentu, sin rèspèt, di fake news.
Verbondenheid ta krusial, pa nos libertat por sobrebibí.

No komprondé mi malu.
Danki Dios nos tin libertat di ekspresá nos opinion.
Pero promé ku bo opiná, bo mester pensa, bo mester keda informá.
Un opinion sin vishon/pensamentu ta un emoshon, rabia, un renkor, bochincha so… Awendia e espasio di nos libertat ta bira dominá dor di esei.

Mi tata a nase den Hongerwinter na aña 1944. E wenter ei tabata hopi friu mes. I tur hende tabatin hamber pa motibu di e guera

Awe nos ta yama Dios danki ku nos no tin un Hongerwinter físiko.
Nos ta gradisidu, pero nos no ta drumi.

Pasobra e klima entre nos hendenan ta friu. Tin hopi guera verbal.
Nos tin hamber pa union, pa ‘verbondenheid’.

Laga nos lanta for di soño.
Laga nos ta konsiente di nos libertat. Kon presioso e ta
Ku nos por biba nos libertat komo rumannan. Ku nos ta biba nos libertat den Spiritu di Señor.Pasobra kaminda e Spiritu di Señor ta, ei tin libertat (2 Kor. 3,17).