Bonochi na tur presente i bon biní na nos resepshon di aña nobo.
Ta un plaser pa mi komo Gezaghèber por risibí boso awe nochi na e resepshon akí. Kuminsamentu di un aña nobo semper ta un momentu spesial. Un momentu pa topa ku otro, pa reflekshoná riba e aña tras di lomba, i pa nos mira padilanti. Ku énfasis riba reflekshon. Pasó sin reflekshon, nos no por krese i desaroyá nos mes na un manera positivo.
Nos ta biba den un tempu di tenshon i instabilidat geopolítiko, tantu den nos region komo na mundu kompletu. E susesonan di fin di siman tras di lomba a demostra esei klaramente. Prekupashon i inseguridat ta reina serka hopi hende. I eksaktamente pa e motibu ei, ta krusial pa nos mantené trankilidat, pas i harmonia den nos komunidat. Esaki ta rekerí dominio propio, solidaridat ku otro i krusialmente: rèspèt pa otro. Esaki ta forma fundeshi, forsa i resiliensia di kada komunidat.
Rèspèt ta rais di e palu ku mi ta yama konfiansa. Hopi bia nos ta lamentá ku nos komunidat ta kore peliger di pèrdè su balornan fundamental. Pero nos mes ta aktua i biba konforme e balornan akí? Si rèspèt ta un balor ku ta karakterisá nos, nos mester demostrá esaki na tur momentu. No mester importá si nos ta di akuerdo ku e otro su opinion; òf ku nos ta bini di mesun bario; òf di e mesun partido polítiko; òf kua funshon e otro tin. Rèspèt mester ta konstante. Di e forma ei nos por krea mas konfiansa serka nos pueblo, den nos institushonnan i den gobernashon. Un komunidat ku un grado haltu di konfiansa ta un komunidat mas fuerte i mas próspero.
Un aña nobo ta duna nos speransa. E ta duna nos oportunidat pa kuminsá di nobo i pa traha plan nobo pa futuro. Pa hopi hende esaki ta un momentu ku nan ta komprometé nan mes na un of mas resolushon pa aña nobo.
Tin hende ta bisa:
- “E aña akí sí mi ta bai kana tur dia.”
- Of: E aña akí mi ta bai baha man na alkohòl.”
- Of asta: “Awor sí mi ta bai stòp di huma.”
Esakinan ta intenshonnan bunita, ku ta mustra nos deseo pa mehorá nos mes i nos bida. Al mismo tiempo nos sa ku hopi di e intenshonnan akí ta disparsé i muri un morto ketu ketu, tin bia asta promé ku yanüari kaba. I esaki di un banda ta hopi komprendibel. Pasó no ta semper ta fásil pa mantené nos na e intenshonnan akí.
Aunke ku hopi bia nos no ta tene nos mes na nos intenshonnan, kasi tur aña di nobo, nos ta hasi e mesun ritual: Nos ta bolbe formulá bon intenshon, i ta bolbe chambuká ku nan, te ora nos entregá i laga nan lòs. Hopi bia, nos no ta para ketu i analisá kiko a bai robes pa nos por siña di dje. I frekuentemente, nos no ta tuma responsabilidat pa loke a sosodé, òf loke nos mester kambia pa nos por konstruí un mihó futuro.
P’esei, awe mi ta ekstendé un invitashon na un i tur akí presente, na tur nos habitantenan, gruponan i organisashonnan i tambe na nos gobernashon. Mi ta invitá boso pa reflehá krítikamente, i kaminda mester, tuma mas responsabilidat pa e kambionan nesesario. Ya asina nos por edifiká e bon intenshonnan ku nos kada un tin.
Tuma responsabilidat ta algu ku nos kada un por hasi.
Kada persona por kontribuí na su manera pa un mihó Boneiru.
Mayornan por invertí mas atenshon den edukashon i guia di nan yunan.
Trahadónan por duna nan granito pa kontribuí na un mihó produkto òf mihó servisio na kliente i éksito di nan empresa;
I nos organisashonnan soshal por sigui dal pasonan pa yega mas serka di e komunidat ku nan ta sirbi.
Komo Gezaghèber di Boneiru, for di aña pasá mi a bin ta dediká atenshon spesial na e tema di bon gobernashon. I mi ke kontinuá ku esaki den 2026. Un bon gobernashon ta unu ku ta inklusivo i responsivo. E ta skucha e señalnan i nesesidatnan di komunidat i ta tene kuenta ku esakinan. Ademas e ta duna oportunidat pa partisipashon aktivo i enbolbimentu di tur hende.
Pero bon gobernashon no por eksistí sin kontribushon di komunidat mes. Pa e motibo akí mi ta invitá komunidat kompletu pa partisipá aktivamente den nos gobernashon. I no partisipá solamente pa medio di bo voto un bia kada 4 aña òf pa medio di ekspresá krítika riba medionan sosial. Pero konsiderá kiko bo kontribushon por ta. Manera e presidente merikano John F. Kennedy a yega di bisa: No puntra solamente kiko bo pais por hasi pa bo, pero puntra tambe kiko abo por hasi pa bo pais.
Ora nos tuma responsabilidat, nos no ta solamente fortalesé nos komunidat, sino tambe nos ekonomia i nos lasonan sosial. Ora nos ta aktivo i ta tuma nos ròl komo siudadano na serio, mas oportunidat pa trabou i desaroyo ta surgi, konfiansa entre hende ta krese i hende ta sinti nan mes mas sigur i mas involukrá den komunidat. Responsabilidat ta yuda nos pa bai dilanti huntu.
Nos isla ta sigui desaroyá i krese rápidamente. Kon nos por mantené e balansa entre un desaroyo ekonómiko positivo i mantenshon di nos kultura i naturalesa? Kon abo komo habitante por probechá di e oportunidatnan ku e kresementu akí ta trese pa bo propio desaroyo i kresementu personal? Ta evidente ku nos no por sigui krese di e mesun forma, sin pèrdè loke ta hasi nos úniko. Pero e eskohonan ku nos mester hasi ku urgensia pa stabilisá e situashon ta rekerí un grado haltu di madures, kurashi i kolaborashon mutuo riba tur nivel den nos komunidat. E ta rekerí un sentido fuerte di responsabilidat.
Pa terminá, mi ke invitá tur presente pa hisa nan kèlki i brinda riba un 2026 yená ku salú, stabilidat i progreso. Pa e ta un aña ku nos por krese den nos konekshon ku otro pa asina konhuntamente nos por sigui konstruí un mihó futuro pa Boneiru.
Felis aña 2026, salú!
