Durante e seis lunanan tras di lomba hóbennan na Boneiru a partisipá na e proyekto Digital Awareness Academy. E proyekto tabata intenshoná pa hóbennan di 12 pa 17 aña i a enfoká riba uso seif, konsiente i responsabel di medionan sosial i teknologia digital.
Durante vários lès i tayer interaktivo, e partisipantenan a siña kon pa anda ku riesgo online, cyberbullying, privasidat i uso sano di pantaya. Tambe nan a optené konosementu básiko tokante inteligensia artifisial (AI) i nan a siña mira informashon online na un manera krítiko.
BITES BV a ehekutá e proyekto, ku sosten di un polis i un sikólogo. Pa medio di e kolaborashon akí e hóbennan no a haña solamente abilidatnan digital, pero tabatin atenshon tambe pa e impakto mental di komportashon online.
Segun e konsehero di maneho pa Hubentut, e proyekto ta mustra kon importante resiliensia digital ta pa hóbennan. Pa medio di hasi nan konsiente di riesgonan online, nan ta traha riba un ambiente digital seif i suidadania responsabel na Boneiru. Den esaki el a mustra tambe riba importansia di e kontribushon sosial ku empresanan i organisashonnan por duna, pa motibu ku netamente e kompromiso konhunto ei ta nesesario pa protehá nos hóbennan kontra e desafionan sosial ku awendia nan ta konfrontá.
Ku satisfakshon e organisashon ta wak bèk riba e proyekto i nan ta spera ku e hóbennan ta sigui hasi uso di e konosementu atkerí i kompartí esaki den nan sírkulo.
