Direktorado di Supervishon i Mantenshon di Lei na Boneiru ta introdusí un sistema di traha renobá pa ehekushon di kontròl i inspekshon. Direktorado di Supervishon i Mantenshon di Lei ta enfoká riba un aserkamentu strukturá i mas preventivo. E aserkamentu akí ta brinda habitantenan i empresanan na Boneiru klaridat tokante e reglanan i na mes momentu ta stimulá nan pa sòru pa nan asuntunan ta na òrdu na tempu, di manera ku por evitá violashon i sanshonnan innesesario. Ku e sistema di traha akí Direktorado di Supervishon i Mantenshon di Lei ke logra un Boneiru mas ordená, mas seif i mas habitabel.
Direktorado di Supervishon i Mantenshon di Lei ta kuminsá dia 18 di novèmber 2024 ku e aserkamentu nobo
Dia 18 di novèmber 2024 Direktorado di Supervishon i Mantenshon di Lei ta kuminsá ku e sistema nobo di traha akí, kaminda e promé área di kontròl lo ta Kaya Industria i bisindario. Durante e kontròl akí e inspektornan designá ta bai kontrolá entre otro presensia di e pèrmitnan korekto, kumplimentu ku legislashon i regulashon vigente, kumplimentu ku instrukshonnan di siguridat i otro reglanan importante ku ta kontribuí na órden i siguridat na nos isla.
Preparashon i sosten di komunidat
Habitantenan i empresarionan ku no sa sigur kua ta e pèrmitnan òf dokumentunan ku nan mester disponé di dje òf ku tin pregunta tokante e kondishonnan di nan pèrmitnan, semper por tuma kontakto ku Direktorado di Supervishon i Mantenshon di Lei via e number di telefòn +599 715 5330.
Direktorado di Supervishon i Mantenshon di Lei ta verwagt ku e aserkamentu nobo i fortifiká akí lo kontribuí na un ambiente di biba mas seif, mas limpi i mas ordená. Ku un mantenshon di lei klarito i konsekuente, Direktorado di Supervishon i Mantenshon di Lei ke engrandesé enbolbimentu i komportashon di kumplimentu di nos komunidat, di manera ku Boneiru ta keda un lugá plasentero i seif pa biba i traha pa tur hende.
