Durante un konferensia ku a tuma lugá ayera na Divi Flamingo Beach Resort, diputado Nina den Heyer di enseñansa huntu ku e direktor-general pa enseñansa primario i avansá Inge Vossenaar, di ministerio di Enseñansa, Kultura i Siensia di Hulanda, a risibí e promé ehemplarnan di e Kuadro di Referensia i e liñanan di siñansa papiamentu.
Meta di e Kuadro di Refenensia i elaborashon di esaki den un kurikulo eskolar ta pa for di un perspektiva multilingwe fortifiká posishon di papiamentu komo idioma materno i e idioma mas grandi ku ta dirigí direktamente riba mucha den i pafó di enseñansa na Boneiru. Pa e motibu akí a elaborá e Kuadro di Referensia den un liña di siñansa kontinuo pa e materia eskolar papiamentu.
E kurikulo eskolar akí ta duna sugerensia pa edifikashon i strukturashon di e oferta di enseñansa di papiamentu pa e diferente nivelnan i ta ilustrá kon durante transkurso di añanan e grado di difikultat di e oferta akí ta oumentá. ‘Esaki ta un siguiente paso importante den direkshon di rekonosementu i resiliensia di papiamentu’, segun e diputado.
