Entidat Públiko Boneiru a pone un bòrchi di informashon na Waf di Piskadó na Playa Pabou. Desvelo di e bòrchi akí ta marka inisio ofisial di e trabounan di mantenshon. E bòrchi di informashon na e sitio ta duna un bista kla di loke ta tumando lugá, dikon esaki ta tumando lugá i kiko e planifikashon ta. Den esaki komunikashon transparente i visibilidat di e trabou ta sentral.
Algun siman pasá a anunsiá ku a firma e kontrato pa mantenshon di e waf, i ku e fase di preparashon a ranka sali. Entre tantu a otorgá e tarea, nan a bestèl e materialnan nesesario i e trabounan a kuminsá. Ku ponementu di e bòrchi di informashon, Entidat Públiko Boneiru ke sigui informá komunidat aktivamente tokante progreso di e trabou. Waf di Piskadó tin un funshon importante den nos komunidat. Pa hopi piskadó esaki ta nan sitio di trabou diario i nan fuente di entrada. Banda di esaki piskamentu tin su raisnan profundamente ankrá den kultura i tradishonnan di Boneiru.
Diputado Clark Abraham ta aksentuá importansia di e momentu akí. “Nos ta kontentu ku nos por realisá esaki awor akí pa nos piskadónan i pa nos komunidat. Nos piskadónan ta duna un aporte balioso na nos ekonomia i na ken nos ta komo isla. Nan meresé fasilidatnan seif i adekuá pa nan por hasi nan trabou.”
Entidat Públiko Boneiru ta sigui informá komunidat tokante e progreso mas aleu di e proyekto. E mantenshon akí ta un paso positivo i importante den fortifikashon di nos infrastruktura marítimo i den dunamentu di sosten na nos piskadónan.
