Ku profundo tristesa gezaghebber John Solianao a tuma nota di e tiroteo ku a tuma lugá den mardugá di 8 di yüni pafó na un klup nokturno den sentro di Kralendijk. A konsekuensia di e insidente un hoben menor di edat a perde su bida.
“Mi kurason ta hasi due. Di un forma violento a ranka kita bida di un persona for di nos. Mi ta kombibí profundamente ku famia i sernan kerí di e víktima. No tin ningun palabra pa suavisá e pèrdida, pero mi ta deseá boso forsa i ofrese sosten den e tempu ku ta inkreiblemente difísil akí”, asina gezaghebber a bisa.
Gezaghebber ta haña e insidente no solamente trágiko, pero preokupante tambe pa henter komunidat.
“Esaki ta afektá nos tur. No ta djis kalke krímen, esaki ta un ataka riba konfiansa, seguridat, i komunidat di nos isla. E sentimentu di trankilidat ku nos ta tesorá ta bou di preshon. I nos no mester permití pa esaki sosodé.”
Gezaghebber ta atvertí ku e violensia kresiente ta un problema sosial amplio, i ku e ta menasá nos komo komunidat.
“Ora tin tiroteo den nos kayanan, nos mester bisa komo komunidat: te aki i no mas leu. Esaki no ta e Boneiru ku nos konosé. Esaki no ta nos forma di ta. I nunka esaki no tin mag di bira nos norma. “
E ta enfatisá ku polis ta hasi tur loke ta posibel pa haña sa e bèrdat i haña e malechornan. Na mes momento e ta dirigí su mes dirèkt na e abitantenan.
“No keda para na kantu. Si bo a mira algu, a tende algu òf sa algu, pa chikí òf no importante ku e por parse, mèldu esaki.
“Awor nos mester di otro mas ku nunka. P’esei mi ta hasi un yamada urgente na bo: Hasi uso di e liña di tep anónimo. Bo por yama 9310. Bo ta keda kompletamente anónimo. Pero bo tep por hasi e diferensia pa logra hustisia.”
