Ku e kampaña “Parker responsabel. Pa un Boneiru ordená i aksesibel”, Direktorado di Supervishon i Mantenshon di Lei ta kuminsá ku mantenshon di lei pa loke ta trata stashonamentu malu di outo.

Ku e kampaña “Parker Responsabel. Pa un Boneiru Ordená i Aksesibel”, Direktorado di Supervishon i Mantenshon di Lei ta kontinuá ku mantenshon di lei pa loke ta trata stashonamentu malu di outo na Boneiru. Ku e kampaña akí Direktorado di Supervishon i Mantenshon di Lei ta sòru huntu ku komunidat pa un Boneiru seif, aksesibel i ordená.

Stashonamentu malu di outo por okashoná situashonnan peligroso i ta sòru pa molèster. Pa e motibu akí Direktorado di Supervishon i Mantenshon di Lei ta kontrolá den un forma mas severo a base di e Ordenansa di Tráfiko Boneiru 2019. Nan ta kontrolá entre otro stashonamentu di outo riba asera, dilanti di entrada di propiedat di otro hende, na un lugá di stashoná outo pa hende ku limitashon miéntras no tin pèrmit pa esaki, na un sitio ku ta destiná pa karga i deskargá i na sitionan kaminda stashonamentu di outo ta forma molèster pa tráfiko.

Direktorado di Supervishon i Mantenshon di Lei ta traha ku un aserkamentu den fase. Shofùrnan di outo ku ta mal stashoná, inisialmente ta haña un steker di atvertensia riba nan vehíkulo. Despues di dos atvertensia ta tou e vehíkulo bai kuné ku un kran destiná pa esaki. Ora plak un steker riba un vehíkulo, e shofùr mes tin ku kita esaki. Ora ku tou un vehíkulo bai kuné, e doño òf e shofùr tin ku tuma kontakto ku Direktorado di Supervishon i Mantenshon di Lei via e number di telefòn +599 790 – 0707. Despues por buska e vehíkulo na e sitio di almasenamentu na Kaya Industria Pariba s/n. E gastunan pa tou e vehíkulo ta pa kuenta di e persona ku a kometé violashon. Banda di esaki e shofùr por haña un but pa motibu di stashonamentu malu.

Direktorado di Supervishon i Mantenshon di Lei ta spera ku tur hende ta kumpli ku reglanan di tráfiko i di stashonamentu di outo. Huntu nos por sòru pa un Boneiru aksesibel, seif i ordená pa tur hende.

“Parker responsabel. Pa un Boneiru ordená i aksesibel.”