CFT no ta konsistente

CFT no ta konsistente
Presupuesto di Entidat Públiko Boneiru ta kumpli ku palabrashonnan hasí ku CFT

Dia 1 di sèptèmber 2021 Kolegio Ehekutivo a entregá presupuesto di Entidat Públiko Boneiru pa aña 2022 na Konseho Insular na tempu i konforme e término legal. Huntu ku e konsepto di presupuesto akí a manda tambe konseho di Kolegio di Supervishon Finansiero (CFT) i reakshon di Kolegio Ehekutivo riba esaki pa Konseho Insular.

Hopi aña largu presupuesto di Entidat Públiko Boneiru a konsistí di solamente informashon tokante tareanan regular i akshonnan di añanan anterior ku un splikashon tékniko di e sifranan. E presupuestonan anterior akí no tabata laga mira na un forma kla, kiko e plannan di maneho di gobièrnu tabata. E sifranan presentá no tabata konektá na e  maneho intenshoná di Entidat Públiko Boneiru. Pa e motibu aki tabata difísil pa direktoradonan di Entidat Públiko Boneiru pone prioridatnan klaro basá riba e fondonan disponibel pa ehekushon, durante e aña presupuestario. Falta di un bista kla riba e propio presupuesto a kontribuí tambe na un situashon kaminda tur aña tabata gasta ménos sèn ku tabata disponibel, loke CFT a trese dilanti den diferente konseho. Kolegio Ehekutivo a duna oido na e konsehonan akí i p’esei den presupuesto 2022 a mustra na un forma bon kla e konekshon entre e intenshonnan di maneho i e medionan finansiero disponibel.

Den vários karta CFT a ekspresá su preokupashon tokante e situashon kaminda ta gasta ménos sèn ku ta disponibel, i tambe a pone énfasis riba e punto akí durante kòmbersashonnan. P’esei ta desapuntante ku den CFT su karta di konseho komo reakshon riba e presupuesto, no ta mira bèk e mehorashon ku a keda realisá.

Uso di reserva general di Entidat Públiko Boneiru
Durante un kòmbersashon ku CFT dia 29 di yüni último, CFT a rekomendá Kolegio Ehekutivo pa hasi uso di e reserva general, i a bolbe konfirmá esaki den un karta di CFT di 13 di ougùstùs último. Netamente a base di e palabrashon akí a disidí pa pone medionan èkstra disponibel den presupuesto 2022 pa por invertí den Boneiru. E medionan akí ta bini disponibel pa medio di hasi uso di un parti chikitu di e reserva general pa ekilibrá e presupuesto. Despues di un análisis eksperto riba e posishon finansiero di Entidat Públiko Boneiru, a resultá ku ta akseptabel pa hasi uso di USD 2 mion for di e reserva general.

A komuniká ku CFT ku Kolegio Ehekutivo ta bai kontratá un eksperto pa hasi un análisis di riesgo amplio, ku lo forma e base pa un kalkulashon renobá di e kapasidat di resiliensia (“weerstandsvermogen”). E resultado di e análisis aki lo keda raportá den un nota di maneho di riesgo i di kapasidat di resiliensia. Komo parti di e mesun enkargo akí, e empleado eksperto lo formulá tambe un nota di reserva i provishon. Teniendo kuenta ku disponibilidat di likides di Entidat Públiko Boneiru, esaki lo inkluí tambe plannan konkreto pa gastunan di gobièrnu.

Pa e motibu akí Kolegio Ehekutivo ta asombrá ku den e karta di 1 di sèptèmber último CFT ta indiká esaki komo punto di atenshon, miéntras ku ya kaba a informá CFT tokante esaki i entretantu e eksperto a kuminsá kaba ku e análisis.

Maneho finansiero
CFT ta remarká ku mester tuma paso pa yega na mehorashon di e maneho finansiero. Turesten ku CFT ta na altura ku ya a tuma pasonan konkreto kaba, no opstante e peso enorme riba e organisashon atministrativo durante e krísis di Covid-19. Diferente punto di mehorashon ta kompletamente solushoná i a realisá progreso signifikante riba vários punto for di e ‘management letter’ di 2019.

Un bon ehèmpel ta ku a eliminá e retraso ku tabata tin den prosesamentu di opheshon. A kuminsá atendé e opheshonnan na luna di yüni 2021, i entretantu tur e 500 opheshonnan ku tabata tin habrí a wòrdu tratá. Otro ehèmpel ta ku awor atministrashon di ofisina di haf ta kompletamente na nivel, a organisá registro di supsidio i atministrashon di proyekto, i a realisá hopi adelanto riba deskripshon di proseso komo parti di e trayekto di digitalisashon. Esaki ta algun ehèmpel di e puntonan ku ya kaba ta solushoná òf bon na kaminda pa resolvé.

Riba tereno organisatorio tambe a realisá mehorashon importante na aña 2021. Asina por menshoná ku e Tim di Direktor, direktorado di Maneho i Sosten i departamento di Finansa ta traha mas integral. Entidat Públiko Boneiru a logra tambe pa  kompletá e kuenta anual 2020 na tempu den e promé parti di e aña akí, ta invertiendo fuertemente den desaroyo di dokumentunan di Planifikashon i Kontròl (P&C) i ta atendiendo seriamente ku e konklushonnan di akountent for di e último ouditorio di e kuenta anual.

Fortifikashon di departamento di finansa i e organisashon mes
Entidat Públiko Boneiru ke realisá un kombinashon di empoderashon i motivashon di empleadonan aktual, i alabes fortifiká e departamento di finansa ku funshonarionan adishonal. Mester inkorporá responsabilidat pa un maneho finansiero sano na un manera duradero den henter e organisashon. Konkretamente esaki ta enserá entre otro ku lo kontratá un hefe di finansa eksperensiá, un ‘concern-controller’ i dos kontroladó nobo.

Den kartanan anterior CFT a indiká ku Entidat Públiko Boneiru mester bai presupuestá e presupuesto di personal i e vakaturanan habrí mas presis. Pa kumpli ku esaki gobièrnu a nombra un empleado spesialmente pa atendé e tarea aki. Di e manera akí a kalkulá un suma mas realístiko pa e vakaturanan ku mester yena, loke a kondusí na un bahada di e presupuesto akí kompará ku añanan anterior. Mirando ku anteriormente CFT mes a remarká esaki, i e splikashon tokante esaki den de konsepto di presupuesto 2022 ta bon kla, ta desepshonante ku CFT tòg ta hasi pregunta tokante esaki den su karta di 1 di sèptèmber último.

‘Mi ta konsiente ku nos tin ainda un kaminda pa bai pa logra haña finansa i atministrashon di gobièrnu di Boneiru mas na òrdu. Sí ta asina ku último tempu nos a dal pasonan grandi pa fortifiká gobiernu su maneho finansiero. Ku e presupuesto ta hinká den otro na un manera asina profeshonal i ku nos a entreg’é na tempu tambe na Konseho Insular ta un logro hopi importante. Esaki ta e tono ku nos a buta awor i pa tur mehorashon ku ta sigui. Naturalmente CFT tin un ròl di supervishon, pero nan por skohe pa kumpli ku e ròl ei  pa medio di sigui duna konseho kontradiktorio òf pa duna krítika konstruktivo ku realmente nos por hasi algu kuné. Gustosamente nos lo ke mira ku CFT komo supervisor ta asumí un ròl konstruktivo, di manera ku konhuntamente nos por realisá mehorashon berdadero pa nos isla’, segun diputado Thielman.