Tourism Corporation Bonaire, TCB, i kompania di aviashon JetBlue a firma na novèmber 2024 un akuerdo ku otro pa dos buelo direkto pa siman di New York (JFK) pa Boneiru. E buelonan akí lo a tuma lugá henter riba djasabra i djamars durante un periodo di tres aña. JetBlue i TCB a terminá e akuerdo akí promé ku tempu entrante yanüari 2026.
E kooperashon entre TCB i JetBlue a kuminsá na 2023 kaba pa temporada di wenter, pero JetBlue a posponé esaki te 2024. E ekspektativanan tabata haltu. E konekshon nobo lo mester a sòru pa oumentá e kantidat di turista for di Merka, loke tabata kuadra ku e Masterplan pa Turismo. Na 2024 TCB i JetBlue a sera finalmente un akuerdo sí a base di un asina yamá ‘minimum revenue guarantee,’ MRG, esta un garantia di entrada mínimo. Esaki ta nifiká ku Boneiru mester paga èkstra si entrada di buelo resultá bou di un sierto suma. Den e akuerdo akí, Boneiru no tabatin influensia riba preis di pasashi òf e kantidat di stul bendé.
Entidat Públiko Boneiru (OLB) no tabata parti den e kontrakt akí i nunka no a komprometé su mes finansieramente pa pago di e MRG akí. Pa lei (artíkulo 11.1 di FinBES), EPB no tin mag di duna fiansa òf duna garantia na nòmber di un terser partido. Ta asina sí ku a petishon di TCB, EPB a pone $ 400.000 èkstra disponibel pa merkadeo pa promoshon di e buelonan. JetBlue a pone $300,000 aserka, i na tur tabatin $ 700.000 disponibel pa promoshon. Sektor privá tambe a invertí ku suma kuantioso. Ku esaki a paga e suma di mas haltu te ainda pa merkadeo di un ruta nobo pa Boneiru.
Apesar di e bon kooperashon entre JetBlue i Boneiru, a resultá finalmente ku e ruta no tabata ekonómikamente faktibel. P’esei JetBlue a manda un faktura pa e suma máksimo di di e MRG. Pa evitá ku JetBlue lo a tuma pasa hurídiko kontra TCB, EPB entretantu a prefinansiá un di promé pago na TCB, pa por kumpli ku nan obligashon segun kontrakt. Awor EPB huntu ku akshonista BHM, TCB i otro partner den sektor di turismo, ke bai en buska di un solushon hustu i konhunto kaminda tur hende ta asumí nan responsabilidat.
Diputado Anthony Weber ta komenta riba esaki : “Afortunadamente ta sigui bula riba e ruta dirèkt di Newark-Bonaire, ke men por sigui sirbi e merkado akí, sea dirèkt òf via un buelo ku konekshon via Atlanta òf Miami. Ademas nos ta sigui papia ku JetBlue tokante un posibel kooperashon den futuro pero unu ku ta enserá menos riesgo pa Boneiru sí.”
