Boneiru por ta orguyoso riba e area di deporte i rekreashon ‘Juanita Egdwina Josephia’ nobo-nobo. E apertura suave ku diputado James Kroon a hasi, den kompania di sekretario di estado di Salubridat Públiko, Bienestar i Deporte, Maarten van Ooijen (VWS), ta un promé paso pa realisá e area di deporte i rekreashon di Tera Kòrá.
“Nos vishon ta ku tur habitante di Boneiru por sali kas den tur trakilidat pa hasi deporte den e area di rekreashon di Tera Kòrá. Akinan nos hendenan por hasi uso di e gymnasio, por kana riba un ruta stipulá òf por sinta trankil i disfruta di nan yunan ku ta praktikando sòftbòl, beisbòl of futbòl. Pa nos semper e siguridat y desaroyo di nos hobenan ta prioridat”, diputado Kroon ta amplia.
Pa kaba ku e proyekto aki den su totalidat, falta ainda un gymnasio i tambe pa krea un sitio di parkeo. Tambe ta bai pone bankinan pa sinta pa tur atleta i bishitante di e area. Pa ku ta e desaroyo di e parki aki ta responsabel partidonan manera Instituto di Deporte Boneriano (Indebon), Bonaireaanse Wegenbouw Maatschappij (BWM), Edelgras i Oostendorp Verlichting. E ministerio di VWS ta kubri mitar di e gastunan enbolbi.
