Boneiru i Royal Caribbean group ta firma Mou

Entidat Públiko Boneiru i Tourism Corporation Bonaire (TCB) a yama Royal Caribbean Group bon biní na Boneiru. Esaki a tuma lugá na bispu di inisio di un kolaborashon stratégiko nobo entre nos isla i e kompania krusero. Melissa Morales, hefe di desaroyo di destinashon pa Norteamérika i Suramérika i área karibense pa Royal Caribbean Group, i diputado Hennyson Thielman a firma un Memorandum of Understanding (MOU). Ámbos partner ke eksplorá posibilidatnan konhunto i mehorá eksperensia di pasaheronan krusero na Boneiru, di manera pa oumentá nan konsumo y gasto ora nan ta na Boneiro. Diputado Thielman a bisa ku e MOU akí ta sirbi pa trese turismo mas serka habitantenan di Boneiru.

‘Huntu ku TCB nos a hinka un programa den otro pa Royal Caribbean Group, pa asina nan por a eksplorá nos isla i mira kiko Boneiru tin di ofresé su bishitantenan. Tambe nos a explorá posibilidatnan interesante ku lo por brinda nos benefisio mutuo,’ segun diputado Thielman. E dia a kuminsá ku un paseo na parti sùit di nos isla ku un stòp kòrtiku na e kasnan di katibu, na bich di Atlantis i di Sorobon. Despues e rekorido a sigui pa Rincon via Karpata i Gotomeer i e tim a haña un promé impreshon di e rikesa kultural di nos isla i nan por a gosa di nos dushi kumindanan lokal durante un lùnch na Mangazina di Rei.

‘Nos ke enfatisá ku preservashon di naturalesa i nos patrimonio kultural ta partinan integral di nos produkto turístiko i desaroyo sostenibel di Boneiru,’ segun diputado Thielman. Nan a firma e MOU riba waf den haf di Playa ku Mariner of the Seas di Royal Caribbean den bèkgrount.

Melissa Morales, representante di Royal Caribbean Group, ta satisfecho tokante e bishita i ta anhelá un kolaborashon hopi fruktífero ku Boneiru. ‘Nos ta ansioso pa fortifiká nos laso di kolaborashon. Nos ta bai traha riba diversifikashon di e ekskurshonnan i riba desaroyo di produkto i nos ta spera di kontribuí na edukashon. Nos ta bai investigá eksperensia di e turistanan i nos ta bai krea programa pa trese e mensahe di Bonaire Bond bou di atenshon.’ E Bonaire Bond ta un promesa di destinashon ku a keda diseñá pa invitá nos bishitantenan pa firma un promesa pa biaha na un manera responsabel i pa respetá nos isla ku komo meta pa preservá e forsa natural di atrakshon di Boneiru durante e añanan binidero.