Boneiru ta desaroyá sistema di klasifikashon pa akomodashonnan turístiko

Gobièrnu di Boneiru, huntu ku e stakeholdernan Tourism Corporation Bonaire (TCB) i Bonaire Hotel and Tourism Association (Bonhata) ta trahando riba un sistema di klasifikashon di hotèl. Den e sistema di klasifikashon akí lo stipulá kriteria pa diferente klase di akomodashon di estadía. Ta inkluí e kriterianan akí den prosedura pa ora ta duna pèrmit di konstrukshon i alabes den e proseso pa revisá e Plan di Desaroyo Espasial Boneiru. Proyektonan nobo di konstrukshon di akomodashon turístiko den futuro lo mester kumpli ku por lo ménos un nivel di 4 te 5 strea.

Turismo di kalidat haltu

Den e vishon nobo pa turismo, manera deskribí den e Plan pa Rekuperashon di Turismo (Tourism Recovery Plan) i Plan Maestro Stratégiko di Turismo (Strategisch Toeristisch Masterplan), Boneiru kier logra un turismo di kalidat haltu i turistanan ku promedio ta gasta mas. Esaki mester resultá den mas stabilidat pa kompanianan, mas empleo, salarionan mas haltu i (muchu) mas bienestar pa e poblashon lokal.

“Un bon sistema di klasifikashon ta duna nos kriteria ku por apliká den reglanan pa dunamentu di pèrmit, i inkluí den e Plan di Desaroyo Espasial Boneiru revisá. Ku esaki komo base, nos ta spera di dal un paso importante pa profeshonalisá e maneho (pa konstrukshon) turístiko i pa protehá e merkado di bibienda pa nos habitantenan”, asina Hennyson Thielman, diputado di Asuntunan Ekonómiko i Turismo ta bisa.

Desishon Preparatorio

Na komienso di desèmber 2021 Kolegio Ehekutivo a dal e promé paso ora e tuma e Desishon Preparatorio Estadia Rekreativo i Konstrukshon di Bibienda (Voorbereidingsbesluit). Ku e Desishon Preparatorio akí gobièrnu ta duna espasio pa atendé prosesonan korektamente i tuma desishonnan bon balansá tokante proyekto nobo di konstrukshon. Ultimo tempu e preshon riba merkado di bibienda a oumentá enormemente. Esaki ta wòrdu kòusá pa gran parti dor ku ta traha òf kumpra hopi kas pa usa komo un di dos kas òf komo kas pa rekreashon. Resultado ta un skarsedat grandi di kas (nobo) i hopi habitante no por haña un kas adekuá i pagabel.

Ku e desishon akí ta wanta pa un periodo ku dunamentu di pèrmit di konstrukshon pa hotèl-, resort- i otro fasilidatnan di estadia turístiko, pa evitá ku ta konstruí hotèl, resort i otro edifisionan turístiko ku no ta kumpli ku e reglanan ku lo bini den e aktualisashon general di e Plan di Desaroyo Espasial Boneiru.